أختيارات كايرو 360 لأفضل وأسوأ مسلسلات رمضان 2019
الأفضل والأسوأ رمضان مسلسلات رمضان نجوم رمضان
Cairo 360
عاوزين الحق ولا ابن عمه؟! موسم رمضان 2019 يعتبر واحد من أسوأ المواسم الدرامية اللي شوفناها. لدرجة إننا مش مصدقين أن مسلسلات بقوة وحجم ليالي الحلمية وأرابيسك كانت بتتعرض في نفس الموسم اللي بنشوف فيه (فكرة بمليون جنيه) و (الواد سيد الشحات)!
لكن علشان نكون منصفين هنحاول من خلال موضوعنا أننا نقدم لكم اختياراتنا من حيث الأسوأ والأفضل في موسم رمضان 2019
أفضل مسلسلات رمضان 2019
زلزال:
اللقاء المرتقب بين محمد رمضان في البطولة وعبد الله كمال كمؤلف. عبد الله ألف مسلسلات قوية جدًا زي مسلسل ونوس ودهشة والخواجة عبد القادر وغيرها. ومحمد رمضان معروف بالمسلسلات اللي بتحقق نسب مشاهدة وجدل كبير. وناس كتير كانت مستنية اللقاء ده. والحقيقة المسلسل قدر فعلًا يحقق المطلوب منه ويعتبر من أعلى نسب المشاهدة
المسلسل بيحكي عن محاولة محمد رمضان استرداد حقه بعد تعرضه للظلم نتيجة المنزل اللي اشتراه والده واللي انهار في زلزال سنة 1992 الشهير.
من الحاجات اللي عجبتنا في المسلسل أنه شهد عودة نجوم بنحبهم للتمثيل من جديد زي حلا شيحة ومنى عبد الغني. والحقيقة أن أدائهم التمثيلي كان قوي ويستحق أنتظارنا لهم.
هوجان:
على الرغم من أنه مسلسل من مسلسلات البطل الواحد، إلا أن مسلسل هوجان من المسلسلات اللي لفتت أنتباهنا بشكل إيجابي جدًا في رمضان. والسبب الأساسي هو الأداء التمثيلي الجيد جدًا من محمد عادل إمام، واللي واضح أنه بدأ يحذف كلمة (عادل) من إسمه علشان يتحول لمحمد عادل الفنان المستقل اللي عاوز يعمل لنفسه إسم قوي ولامع بعيدًا عن سطوة والده.
المسلسل بياخدنا في رحلة شيقة في عالم الناس اللي عندها قوى خارقة، من خلال رحلة هوجان صاحب القوى الخارقة اللي بيتورط في أحداث كتير غريبة نتيجة القوى اللي بيتمتع بيها.
كان واضح جدًا الكتابة الجميلة من محمد صلاح العزب واللي بيثبت نفسه يوم بعد يوم ككاتب قادر يقدم دراما مختلفة. كمان أداء كريم محمود عبد العزيز كان كويس جدًا زي ما عودنا في معظم أعماله الأخيرة.
ولد الغلابة
رغم انتشار الكلام عن إن القصة مقتبسة من مسلسل أجنبي، إلا إننا بنعتبر ولد الغلابة واحد من أحسن مسلسلات رمضان 2019 خاصة وأن البطل فيه هو أحمد السقا. وهو من الممثلين التقال في مصر. كمان عجبنا في المسلسل أن السقا مش بيقدم فيه شخصية شخص قوي وبيعرف يعمل كل حاجه لوحده. بالعكس السقا بيلعب شخصية مدرس عادي وبسيط بيتورط في عالم تجارة المخدرات بعد ما بيتعثر ماديًا.
الجميل في المسلسل ان بيلعب قدام السقا شخصية ضاحي أو محمد ممدوح (تايسون). وتايسون بيلعب في رمضان دورين. الأول مع السقا في ولد الغلابة والثاني في مسلسل قابيل اللي هنتكلم عنه هو كمان كواحد من أفضل مسلسلات رمضان.
قابيل
واضح أن محمد ممدوح قرر ينافس نفسه من خلال المشاركة في اتنين من أقوى الأعمال في رمضان. مسلسل قابيل بينتمي للمسلسلات اللي فيها جرعة كبيرة من الغموض والإثارة البوليسية. مع كمية رعب لا بأس بها. والمسلسل بيحكي عن ضابط شرطة بيعاني من اضطرابات نفسية بيحاول يحل لغز قاتل متسلسل مجهول الهوية.
أسوأ مسلسلات رمضان 2019
حدوتة مُرة
كان ممكن مسلسل غادة عبد الرازق يكون من أفضل مسلسلات رمضان لو كان ابتعد عن التكرار في القصة وفي طبيعة كاركتر البطلة اللي بتقوم بيها غادة عبد الرازق. المسلسل بيحكي عن مُرة اللي بتقرر تغير مصيرها وحياتها على الرغم من محاولة معظم الناس المحيطة بها أنهم يهدوها. واختلاف طباعها لما توصل لمكانة عالية ويبقى معاها فلوس. مافيش جديد على أي صعيد في المسلسل ده. الأداء التمثيلي كمان كان كله استسهال وعدم رغبة في الخروج من القوالب الجاهزة لكل شخصية.
فكرة بمليون جنيه
على ربيع بطل مسرح مصر في واحد من أسوأ الأعمال اللي قدمها. مش بس في رمضان الحالي لكن في تاريخه الفني كله –وهو تاريخ مش طويل بالمناسبة- والحقيقة إن علي ربيع بيقدم نفس الشخصية اللي بيقدمها في كل أعماله. وبنفس طريقة الأداء. وده لو كان بيضحك الناس زمان مابقاش دلوقت بيضحك خاصة انه بييجي مع مواقف سخيفة جدًا وحوار ضعيف جدًا. ومافيش أي بطل كوميدي قادر يسند المسلسل.
البرنسيسة بيسة
لازم ندور على الشخص اللي أقنع مي عز الدين أنها محتاجه تدينا انطباعات وأشكال غريبة بوشها علشان تبقى كوميدية.. الشخص ده لازم نعذبه بأننا نجبره يتفرج على (البرنسيسة بيسة) طول اليوم!
المسلسل بيحكي عن بيسة البنت الشعبية اللي بتورث مدرسة فخمة جدًا. وفي نفس الوقت بتلعب مي عز الدين شخصية الجدة اللي المفروض تتسبب في حدوث مفارقات كوميدية. لكن حتى الشخصية التانيه بنشوفها بمكياج سيء جدًا.
الحقيقة أن مي عز الدين بتقدم لنا أداء ضعيف ومبالغ فيه. مع كتابة غير كوميدية إطلاقًا وإخراج كانت كل أدواته مكررة ومافيهاش أي جديد.
الواد سيد الشحات
لو هنتسامح مع تقديم مسلسل ضعيف من أحمد فهمي – مع أنه فنان تقيل وله وزنه في منطقة الكوميديا- فاأكيد مش هنتسامح مع ردوده السيئة والمستفزة على الجمهور على السوشيال ميديا. واللي بيعبروا عن رأيهم في عدم حبهم للمسلسل فبيرد عليهم فهمي بإسلوب مش كويس وأحيانا فيه شتيمة!
المسلسل بيحكي عن (سيد) الشاب الفقير اللي بيتورط مع عصابة بتطلب منه تدبير مبلغ كبير من الفلوس بتضطره يدخل في مفارقات المفروض أنها كوميدية.
الكوميديا في المسلسل ضعيفة جدًا. على الرغم من محاولة توزيعها على باقي الممثلين هنا الزاهد ومحمد عبد الرحمن واللي بيقدموا أداء كويس في أعمال تانيه. لكن في (الواد سيد الشحات) الأداء كان تحت الصفر!
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
