The Definitive Guide to Living in the Capital , Cairo , Egypt

للمرة اللى مش عارفين كام للتعاون بين الزعيم عادل إمام والمؤلف يوسف معاطي، وللمرة الأولى منذ أكثر من مسلسل ما استعانش عادل إمام بابنه رامي في إخراج أعماله، أو ابنه محمد في مشاركته البطولة، وإن كان استعان بهيثم أحمد زكي ابن الفنان الراحل الشهير -يعني ما راحش بعيد برضه- واضح أن عادل إمام عرف سر الخلطة اللى بـ تعجب الجمهور كل سنة، وقرر أنه يقدمها مرارًا وتكرارًا!

بـ تبدأ الحلقة الأولى بمشاهد اختطاف وضرب عادل إمام اللى بـ نعرف أنه بـ يشتغل أستاذ ورئيس قسم الحشرات في أحدى الجامعات المصرية.. ميوله السياسية اليسارية وآراؤه اللى ضد الدولة بشكل عام وضد رئيس الوزراء بشكل خاص بـ تخليه دائمًا عرضة لاضطهاد أجهزة الأمن ومعاملتهم السيئة معاه.

بـ يبدأ فوزي جمعة في تأسيس حزبه "إيه" اللى بـ يعتبر حزب سياسي يساري مناهض لسياسات الحكومة.. الأمر اللى بـ يفجر حالة من السخرية من كل الأحزاب سواء معارضة أو مع الدولة.. بالإضافة للنشطاء السياسيين وكل العاملين في المشهد السياسي المصري.. اللى تحول بالفعل مؤخرًا للوحة سريالية ساخرة كبيرة.

عادل إمام لسه قادر على العطاء الفني على الرغم من تقدمه في السن، لكن مشكلته الوحيدة أنه متخيل أنه هـ يقدر يؤدي نفس الأدوار القديمة بكل ما فيها من تعاطي خمور وعلاقات نسائية، وكأن إمام لا يزال ساحر النساء وزير النساء الأول وهو أمر ما كانوش عادل إمام في بدايته أو متوسط مسيرته بالتالي من غير المنطقي أنه يطلع النهارده في نفس الدور!

كان عجبنا في "صاحب السعادة" أنه كان أكثر انحيازًا لدور الأب والجد عن أي دور ثاني، أحداث ثورة 25 يناير بـ تندلع في المسلسل في الحلقة السادسة تقريبًا، وبـ يبدأ المسلسل يرصد التغيرات اللى حصلت في المجتمع المصري بعد الثورة بأسلوب ساخر، وعلى الرغم من مواقف عادل إمام ضد الثورة، إلا أنه بـ يظهر في المسلسل كمنحاز للثورة، وده مش جديد على الوسط الفني اللى ظهر فيه خالد الصاوي مثلًا كرجل ضد الثورة بينما هو في الحقيقة منحاز لها قلبًا وقالبًا..

"أستاذ ورئيس قسم" مسلسل تقليدي لعادل إمام بـ يسخر فيه من كل شىء وأي شىء.