The Definitive Guide to Living in the Capital , Cairo , Egypt

تليفزيون
أمريكا بالعربي

أمريكا بالعربي: برنامج لباسم يوسف عن الفصام في الشخصية المصرية على النهار

  • كوميدي
  • من الآن
  • محمد خليفةمحمد خليفة
تم التقييم بواسطة
Cairo 360
قيم
قيم الآن
أمريكا بالعربي: برنامج لباسم يوسف عن الفصام في الشخصية المصرية على النهار

ما حدش يقدر ينكر أن باسم يوسف أصبح له شعبية كبيرة جدًا في الفترة الأخيرة، وكلنا لاحظنا جرعة الجد اللي كانت بـ تتخلل برنامج “البرنامج” في بعض فقراته، بعدين يرجع يضحكنا ثاني في نفس البرنامج ويتريق على نفسه أنه تكلم بجد، أهي جرعة الجد الصغيرة دي بقى تحولت لبرنامج كامل اسمه “أمريكا بالعربي”.

البرنامج مضمونه وفكرته جادة، لكن الطبع يغلب التطبع، وباسم اللي تعود يكون مرح ويضحك الناس ما يقدرش يقدم برنامج من غير ما يكون فيه مسحة كوميديا، لذلك ورغم جدية المضمون البرنامج مقبول وحلو، يخلي المشاهد يقعد أمامه مركز ويبدأ يطرح الأسئلة جواه.

البداية مش موفقة قوي مع موسيقى مصطفى الحلواني، وتتر فيه مشاهد مقربة قوي على وجه باسم بطريقة مش حلوة وهو بـ يجري في استعراض لشوارع الولايات المتحدة، “حلو قوي يا باسم تعالى نعمله مرة كمان” جملة بـ تُقال في نهاية التتر لباسم اللي بـ يكون خلاص نفسه اتقطع من كثر الجري في شوارع أمريكا، بنفس السرعة اللي اتعمل أكثر أجزاء البرنامج بها في فترة وجيزة جدًا.

صحيح باسم أخذ أجازة من برنامج “البرنامج” علشان “أمريكا بالعربي” والمتابعين زعلوا، لكن خلينا نعترف أن النتيجة مذهلة، فكرة البرنامج بـ تدور أساسًا حول فكرة الانفصام اللي داخل ناس كثير في مصر تجاه أمريكا، البداية مع حجرة كلها ورق وآلة كاتبة وباسم واقف فيها بذقن ونضارة كأنه واحد من الحكماء، وبـ يسأل نفسه أكتب إيه عن أمريكا؟ أقول إيه؟، بعدين يبدأ يفتكر كلام الناس حول الدولة العظمى: “أنا أختي وأخويا شغالين في أمريكا”، “أمريكا عدوة مصر، هم سبب كل البلاوي” في النهاية بـ يوصل لنتيجة أن علاقتنا بأمريكا علاقة ناس مش عارفة هي عاوزة إيه، ما حدش عارف إحنا بـ نحبها ولا بـ نكرهها، ناس بـ تكره سيرتها وناس بـ تقف طوابير على سفارتها علشان تسافر كل واحد بـ يدفع 800 جنيه علشان يقدم للسفر لأمريكا، آلاف كل يوم، وناس بـ يقدموا كذا مرة، مقابل ناس رافضين  أمريكا تدخل في ثقافتنا، مع ذلك ثلاث أرباعنا بـ يشرب بيبسي ويأكل شيبسي، وهوت دوج كنتاكي وماكدونالد، وهمبورجر، ونسكافيه من ستاربكس.

باسم بـ يحاول يدخل في دماغ المصريين يشوفهم بـ يفكروا في أمريكا إزاي، بـ يقول أن كثير شايفين فيها مجرد مكان الشباب يعيشوا لهم يومين فيه وسط الهلس والتهريج، وناس ثانية شايفاها أرض الأحلام اللي الواحد بـ يروح يأخذ منها فلوس كثير ويرجع زي شغل المافيات، وما حدش فاهم حاجة.. من الآخر فيه حالة فصام في التعامل مع أمريكا “شيزوفرنيا”.

البرنامج بـ يقوم على مجموعة من المقابلات مع مجموعة من المصريين والعرب المغتربين المقيمين في أمريكا، وبـ يناقش وجهات نظرهم، وإزاي هم شايفين مصر، اكتشفنا حاجات ما كناش نعرفها زي مثلاً أن فيه مصريين في أمريكا بعثوا جواب للرئيس الأسبق محمد حسني مبارك علشان يطالبوه بـ تداول سلمي للسلطة وتحسين أحوال المصريين ووصل الجواب لديوان الرئاسة، وبعدين “اتزحلق” على حد تعبير ضيوف الحلقة.

قصص كثير عن الاحتفاء بالمصريين في الخارج بعد الثورة، والانبهار الشديد بمصر، وكلام عن الاتهامات الجاهزة لأي عربي أو مصري عايش في أمريكا، بره بـ يقولوا أنت عربي إرهابي وبالداخل يقولوا أنت أمريكاني عميل، شباب بـ يبكي نفسه يرجع مصر، ده غير مجموعة من الانفرادات المهمة جدًا زي أول لقاء إعلامي مع عمر عفيفي اللي قالب الدنيا في مصر ببوستات كثير بـ ينشرها على الفيسبوك ومع جون ستيوارت وغيره.

عجبك ؟ جرب

"خواطر 9" لأحمد الشقيري على mbc.

نصيحة 360

البرنامج مفيد وبـ يعرفنا على شخصيات ما نعرفش عنها حاجة وبـ نقدر نشوف من خلاله يعني إيه حنين لبلد عظيمة اسمها مصر، بـ يتعرض كل يوم الساعة 9:30 مساءً على قناة النهار، والإعادة الساعة 11:30 مساءً على قناة +2، وهو من إخراج محمد خليفة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح