The Definitive Guide to Living in the Capital , Cairo , Egypt

قليل من برامج التوك شو اللي بـ تقدر تثبت نفسها وتكمل لموسم آخر وخصوصًا لما يكون برنامج بـ يستضيف نجوم الفن في حوار وأسئلة مفاجأة وكل ده على الهواء، أكيد عرفتوا نقصد مين؟ أيوه صح برنامج “أنا والعسل” الموسم الثاني للمذيع المتميز نيشان ديرهاروتيونيان ونجومه غير العاديين “اللي زي العسل” وأسئلته الساخنة.

موسم السنة دي من “أنا والعسل” مختلف عن موسم السنة اللي فاتت وده هـ تلاحظوه في مقدمة البرنامج اللي بقت كأنها مقدمة لمسلسل “ألف ليلة وليلة” مع موسيقاها المميزة، يبدأ البرنامج بوجود شخصية “شهرزاد” اللي بـ تقول لمحة عن ضيف الحلقة وبعد كده نيشان بـ يرحب به/ بها، طريقة دخول الضيوف جامدة وجديدة كأنهم في قصر شهرزاد وشهريار وبـ يستقبلهم مجموعة من الشباب بسيوفهم ويرحبوا بهم وبعد كده نيشان يبدأ في الترحيب بالضيف واستقباله.

السنة اللي فاتت نيشان كان كل ضيوفه “العسل” من الفنانات لكن السنة دي العسل كان من الجنس الخشن برضه واستضاف نجوم زي: باسم يوسف وحسن الشافعي ويا ترى هـ يكون فيه عسل مذكر ثاني؟، الإخراج المتميز من المخرج باسم كريستو كان واضح قوي في سلاسة حركة الكاميرا والتزامن بين أسئلة نيشان وسرعة التركيز على وجه الضيف علشان يبين رد الفعل عنده، كمان الـ Close على الضيوف في قصات شعرهم وستايل لبسهم وإظهار الشياكة والأناقة وكمان في التركيز على الديكور اللي باين فيه إمكانيات مش قليلة أو زي ما قال باسم يوسف “الصرف باين ما شاء الله”، خلال زمن الحلقة بـ يكون نيشان والضيف على ترابيزة زجاجية وأمام الضيف برطمان عسل نحل.

أسئلة الحلقة الأساسية بـ تكون سؤال نيشان عن الثقافة والجمال والأنوثة والكاريزما وقد إيه النجم بـ يقيم نفسه من 10 وبـ تُعرض صورة للنجم “فوتوشوب” كأنه شهريار أو شهرزاد، بعدها يبدأ نيشان في ممارسة هوايته المفضلة في توجيه أسئلة مباشرة للضيف “الصريح” الغرض منها الحصول على إجابات صريحة أو أسئلة مراوغة في حالة ضيف “بـ يلف ويدور” وده خلانا نخمن أن الضيوف مش عارفين نوعية الأسئلة اللي هـ تُسأل لهم ودي حاجة كويسة لكن لغاية دلوقت ما كانش فيه مفاجآت زي حلقة السنة اللي فاتت مع الفنانة شيرين عبد الوهاب، الفقرة الأخيرة بـ تكون فقرة “حد السيف” عبارة عن 10 أسئلة ويظهر فيها الشباب بالسيوف مرة ثانية واقفين حول الترابيزة ومع نهاية كل سؤال بـ ينزلوا سيف من السيوف مع موسيقى مفاجأة وتخض، نهاية الحلقة بـ تكون صوت الديك وجملة “سكتت “اسم الضيف مضاف إليه زاد أو يار” عن الكلام المباح.

الفقرات دي مش دائمًا ثابتة وبـ تتغير في حالة ضيف غير عادي زي السيدة اعتماد خورشيد اللي حلقتها السنة اللي فاتت كانت من أهم وأسخن الحلقات وحلقة السنة دي ما اختلفتش كثير عن حلقة السنة الماضية.

برنامج “أنا والعسل” من البرامج اللي اتبسطنا لما عرفنا أنه هـ ينورنا للموسم الثاني، كمان هـ تنبسطوا أكثر لو كان الضيف من نجوم الغناء لأنه هـ يمتعكم بصوته في غناء مباشر وده كان واضح في حلقة ميريام فارس (من المفضلات للناقد).

كل سنة وأنتم طيبين وتكون أيامنا كلها عسل في عسل.