The Definitive Guide to Living in the Capital , Cairo , Egypt

أحداث المسلسل بـ تبدأ بالطفل سيف الدسوقى اللى بـ يروح مع أبوه مولد “إبراهيم الدسوقى” بمحافظة كفر الشيخ.. وبـ يعرفه شيخ هناك أن جده هو “سيدى إبراهيم” وأن أبوه سماه سيف علشان هو اللى ورث سيف الشيخ.

المسلسل أحداثه سخنة جدًا وبـ تبدأ من الحلقة الأولى بحادثة بـ تحصل له هو وزوجته (إيمان العاصى)، المهم بـ تموت زوجته اللى كانت حامل… يا ترى خلصت كده؟

استنوا يا جماعة.. الحلقة لسه ما خلصتش، صاحب عمره رياض (أحمد رزق) واللى كان  زى أخوه طلع بـ يسرقه ودى كانت القشة اللى كسرت ظهر البعير، ومع أن الإكسلانس (أحمد عز) ماسك عليه ورق يوديه فى داهية إلا أنه اكتفى بطرده من الشركة لغاية ما بـ يحصل حريق جامد فى أكبر مخازن الشركة.

وهنا الإكسلانس بـ يفكر أن رياض هو اللى وراء الحريقة وبـ يقرر يسلم الورق اللى معاه للنيابة لكنه بـ يتفاجئ برياض بقى وزير فى حكم الإخوان.

يا ترى إيه اللى هـ يحصل من رياض ولا إيه هـ تبقى طلبات الجماعة من الإكسلانس خصوصًا أنهم اختاروا رياض علشان يكون واجهة بس وينفذ كل أوامرهم وطبعًا هددوه بالملفات الجنسية اللى مسجلينها لرياض.  

دى كانت الحدوتة بشكل سريع مش هـ نحرق باقى المسلسل اللى أكيد شايل مفاجآت كثير وزى ما تكلمنا عن قصته وممثلينه لازم نتكلم عن أداء الممثلين فيه واللى أكثر حد ظاهر فيهم هو (أحمد عز) ودى بقى المشكلة الكبيرة اللى بـ تواجهنا فى الدراما أن التركيز بـ يبقى على البطل أكثر حاجة، لازم الكاميرا تيجى عليه 15 مرة فى الحلقة والباقى 3 مرات بس.

على عكس الدراما فى الخارج اللى بـ تخلي أغلب المشاركين فى العمل أبطال والمخرج لعب الموضوع بشكل جيد وتقدر تعرف احترافيته من مشهد الحادثة -ده إحنا صدقناه- هـ تعيش اللقطة وكأنك بـ تتفرج على حاجة حصلت حقيقى.. وكأنكم -بعد الشر عليكم يعنى- كنتم معاهم فى العربية.

لسه فيه أبطال ثانية ما جيبناش سيرتهم لكن دورهم حلو جدًا وأدائهم التمثيلى عالى ومؤثر وعارفين يقنعوك زى “نسمة” (انتصار) و”مريم” (نور).

من المهم أننا نقول أن التركيز على الفترة التاريخية القريبة اللى حكم فيها الإخوان لها مميزاتها وعيوبها، فمن مميزاتها أننا نشوف وجهات نظر مختلفة فى حاجة عايشينها.. لكن عيوبها أننا مش هـ نقدر نلم كل المعلومات الكاملة عن الموضوع فى الوقت القليل ده.

علشان تعرف مواعيد وقنوات عرض “الإكسلانس” زور “دليل كايرو 360 للتليفزيون فى رمضان“.