The Definitive Guide to Living in the Capital , Cairo , Egypt

برامج المقالب في رمضان أصبحت كلها للأسف مجرد نسخ مكررة من بعضها، إحنا ملاحظين السنة دي أن مستوى الصرف على البرامج دي عالي جدًا، وفي المقابل مستوى الضحك أو الكوميديا بـ يتراجع سنة بعد سنة، الشىء الوحيد اللى بـ يتطور هو القبح والشتائم والكلام والتصرفات غير المقبولة!

البرنامج بـ يبدأ بخالد منصور وشادي ألفونس بـ يغنوا بطريقة الراب تتر البرنامج.. كلمات التتر مش مترابطة على الرغم من الموسيقى الحماسية، لكن الكويس أن الأغنية بـ تشرح المقلب بـ يتم إزاي.. هـ يتم إيهام الضيف المخدوع بأنه هـ ينط من طائرة بالباراشوت، وبـ يتم تدريبه سريعًا (الضيف) بعد لقاء بمدرب الطيران اللى هـ يقفز معاه (مسمينه في البرنامج أبو سوسو.. أه والله) وبعدها بـ تبدأ الخدعة لما يحاول الضيف يجذب الحبل بتاع الباراشوت.. فقط علشان يكتشف أنه مش شغال وأنه معرض للسقوط!

على الرغم من أن الفكرة ممكن يكون فيها بعض التجديد، إلا أن الأسلوب المعتاد في التعليق على الأحداث من خالد منصور في غرفة التحكم.. مع استعمال مكثف للألفاظ من شادي أفقد البرنامج أي تميز كان بـ يسعى أنه يوصل له.

من سلبيات البرنامج أصلاً أن الخدعة الأصلية المعتمدة على عدم القدرة على فتح المظلة، بـ تستمر لوقت قصير جدًا ثم بعدها بـ يتم محاولة إيهام الضيف بسقوط شادي وأنه لقى مصرعه… ومراقبة انفعالات الضيف اللى بـ تتنوع بين الصراخ الشديد لروجينا مثلاً أو الانهيار في البكاء زي داليا البحيري أو الذهول التام زي قمر، ثم بـ يتم كشف الخدعة كلها وعمل لقاء نهائي مع الضيف… نفس تيمة رامز جلال أو محمد فؤاد أو أي برنامج مقالب شوفناه في الفترة اللى فاتت.

في رأينا حلقة قمر كانت الأسوأ على الإطلاق.. بداية من المعاكسات الفظة من شادي ألفونس، للتريقة أو التحرش اللفظي من تعليقات خالد منصور اللى كانت خالية من أي ذوق، ونهاية بردود أفعال قمر نفسها اللى ما شفيتش غليل المشاهد السادي اللى بـ يحب يتفرج على الناس لما تكتشف أنها مش عارفه تفتح الباراشوت!

التجربة الخفية برنامج مقالب تقليدي.. كان ممكن يكون أظرف وأحسن وأقوى، لولا الرغبة في تقديم عمل نمطي في رمضان لمحبي برامج المقالب والسلام.