The Definitive Guide to Living in the Capital , Cairo , Egypt

عبده:

"ثلاث سنين وهى بـ تعمل نفس الحاجات.. هـ تروح لمكتب الأستاذة نشوى وتتأكد من نظافته.. هـ تبص فى سلة "الزبالة" علشان تتأكد من نظافتها.. هـ تبص على حوض السمك وعلى الزرعة علشان تتأكد أنها اتسقت.. وساعتها هـ تقول "برافو عليك يا عبده" وبعد كده هـ تدخل الكافيتريا وتتأكد أنى نظفتها كويس.. وهـ تمسح بكلينكس على الترابيزة اللى بـ تمسحها كل يوم.. وتمسك كوباية تتأكد من نظافتها.. وبعدين تعمل لنفسها كوباية شاى أخضر".

دى المقدمة اللى قالها عبده عن حنان المسؤولة عن الشركة واللى بجد لخصت شخصيتها، مع الوضع فى الاعتبار أن شخصية عبده لوحدها تُدرس أصلًا بطريقته فى الكلام وحركاته ولغة الجسد العالية قوى عنده.. هو ممثل موهوب.

دينا:

أما الشخصية الثانية فهى نشوى مسؤولة التصميمات فى الشركة واللى مستحيل تبدأ يومها إلا بعد ما تلعب يوجا الأول وتأخذ نفس عميق وتستقبل الحياة بمزيد من البهجة وهى طيبة جدًا ومبدعة ومهتمة بالأبراج وطبعًا مزاجية جدًا.

عز:

عز بقى مسؤول التسويق والمبيعات، وهو كائن مستريح طوال الوقت وبـ يكذب كثير لكنه بـ يفهم فى التسويق كويس جدًا… حلمه أنه يبقى مدير لكن مشكلته أنه ما بـ يركزش.. وبـ يقلش طوال الوقت.

ضياء:

المبهج دائمًا هو ضياء رئيس قسم البرمجة.. محتاج حد يوجهه ونفسه يبقى مدير وبينه وبين الجنون والعبقرية شعرة.

نادية:

نادية بقى هى الكبيرة، مديرة المكان كله، طيبة جدًا.. مشكلتها أنها بـ تغير الجدول باستمرار.. وقادرة على التوازن بين الشغل وأولادها الاثنين.. بـ تهرج طوال الوقت معاهم وعندها قدرة على إدارة الشركة بشكل احترافى.. وساعات بـ ترخم على ضياء.

حمدى:

شخصية غنية عندها فلوس كثير وهو صاحب الشركة وهو رئيس مجلس الإدارة.. وهو صاحب رأس المال وهو كل حاجة وكل شركاته بـ تخسر وبـ يحاول مع دكتور مرعى خبير الإدارة علشان يحل مشاكل الشركة.

السيت كوم:

بس يا جماعة هى دى فكرة السيت كوم اللى قائمة على فكرة الشركة اللى ممكن تتقفل فى أى وقت علشان مافيش مكسب.. وبـ تدور الأحداث حول شغل كل واحد وتخطيطه علشان الشركة ما تتقفلش وكمان قدرته على إنجاح الشركة.. ويا سلام بقى لو الشركة غيرت نشاطها ضحك السنين صراحة.. مع ملامسة خفيفة لحياة كل واحد الخاصة.

الديكور:

الديكور فى المسلسل هادئ ومودرن جدًا وماشى مع فكرة أنها شركة تصميمات وإبداع.. وكمان "الكافيه" اللى بـ يقعدوا فيه تصميمه قريب جدًا من الشركة.

الضحك:

ضحك الجمهور قليل مش مفتعل وكمان فى مكانه جدًا.. أما عن ضحك حضرتك فهو كثير الصراحة لأن المسلسل مكتوب حلو وفيه فكرة ونسيبكم بقى معاه وأنتم ورأيكم.