The Definitive Guide to Living in the Capital , Cairo , Egypt

انطباعات كايرو 360 الأولية عن 5 مسلسلات رمضانية
بواسطة
Mohamed Hamdy

كل سنة وأنتم جميعًا بخير، مناسبة رمضان. شهر الصيام والعبادات والعزومات و…. المسلسلات! الحقيقة أن من أشهر الحاجات المعروف بها رمضان هي كمية المسلسلات والأعمال الدرامية اللي بيتم عرضها خلال الشهر الكريم.

وعلشان إحنا في كايرو360 مش بنحب نعمل ريفيو لعمل قبل ما نشوفه بالكامل، حبينا نشارك معاكم بعض الآراء الانطباعية عن الحلقات الأولى من أهم وأقوى مسلسلات رمضان 2018 وتوقعاتنا بخصوص مستواها في الحلقات القادمة، علشان نضعكم في قلب خريطة الدراما في رمضان الحالي… تعالوا نبدأ مع بعض.

نسر الصعيد

نجاح كبير بيعمله محمد رمضان كل سنة مع المسلسل الجديد اللي بيقدمه لجمهور عريض في مصر والدول العربية. رمضان نشيط جدًا السنة دي، بيقدم مسلسل جديد بالأضافة لسلسلة من الأعلانات، ده غير فيلمه الجديد اللي هيعرض قريبًا.

وفي رمضان السنة دي بيقدم لنا رمضان مسلسل (نسر الصعيد) واللي ألفه محمد عبد المعطي والمسلسل من إخراج ياسر سامي.

نسر الصعيد بيحكي عن ضابط الشرطة (زين) صعيدي الأصل، واللي بيدخل في صراع طويل ودموي مع تاجر ومجرم من الصعيد برضه. لكن الصراع في المسلسل مش بس دموي، لكن عاطفي كمان من خلال تشتت زين في علاقة حب بتظهر تفاصيلها مع الحلقات اللي بنشوفها.

بيشارك رمضان بطولة المسلسل العبقري سيد رجب ودرة ووفاء عامر ودينا وعايدة رياض. والمسلسل محقق معدلات مشاهدة متميزة على مواقع السوشيال ميديا، على الرغم من شعورنا ببعض الاستعجال أثناء تصوير المسلسل واللي نتج عنها بعض أخطاء في مكياج الشخصيات تداولتها مواقع السوشيال ميديا مؤخرًا.

محمد رمضان بيقدم أداء تمثيلي قوي ومتميز وواضح أنه اشتغل على نفسه بقوة في الفترة الأخيرة، وسيد رجب بيبهرنا في كل مرة يقدم فيها شخصية على الشاشة بقدرته على اكتشاف أبعاد جديدة لها وتقديمها بطريقة مختلفة عن أي مرة قدم فيها نفس الشخصية قبل كده.

عوالم خفية

المسلسل السنوي للزعيم عادل إمام، لكن المرة دي بشكل مختلف بعد قرار أمام عدم التعاون السنة دي مع كاتبه المفضل يوسف معاطي، والمرة دي بيتعاون الزعيم مع أمين جمال ومحمد محرز في التأليف، مع الاحتفاظ برامي إمام في الإخراج.

عوالم خفية بيحكي عن صحفي كبير بيقرر نشر مجموعة من المقالات بتهاجم الحكومة، الأمر اللي بيفتح عليه سلسلة لا تنتهي من المشكلات والأحداث المثيرة.

بيشارك الزعيم في البطولة صلاح عبد الله وفتحي عبد الوهاب و بشرى وهبة مجدي بالإضافة لمجموعة من الوجوه الشابة زي طارق صبري ومحمود حجازي وهند عبد الحليم ونور قدري وخالد عليش.

المميز في المسلسل هو الأداء الراقي والهادي من عادل إمام، وقدرته على تقديم الكوميديا والأكشن والمؤامرات بشكل جميل وخفيف في نفس الوقت، الجميل أيضًا تقديمه الفرصة لجيل من الشباب أنهم ياخدوا فرصتهم أمامه في مشاهد كاملة، كمان واضح في المسلسل البذخ الإنتاجي والتركيز على تصميم الخدع الفنية بمهارة واحترافية.

كلبش 2

الجزء الثاني من واحد من أشهر مسلسلات رمضان الماضي. أمير كرارة بيستمر في تقديم شخصية سليم الأنصاري، ضابط الشرطة اللي بيتعرض لمجموعة من المؤامرات بيواجه فيها الفساد والرشوة ومحاولات توجيه الأعلام والمجتمع.

المسلسل من إخراج بيتر ميمي وتأليف باهر دويدار، وبيشارك كرارة البطولة هيثم أحمد زكي وهالة فاخر وروجينا ومحمود الزاوي.. والحقيقة أن البزاوي قدم أداء مميز ومختلف تمامًا عن أي دور تاني قام بيه، ومحمود من الفنانين المميزين اللي بيتبعوا المدرسة القديمة في دراسة الشخصيات اللي بيقدموها علشان كده بيخرج أي دور بيقدمه بشكل مميز وقوي.

كمان من الواضح في المسلسل المجهود اللي قام به أمير كرارة في الشغل على نفسه علشان يكون أقوى وأكثر ملائمة للدور، لكن بعض أخطاء المونتاج والتصوير لاحظها المتابعين على السوشيال ميديا وشاركوها مع باقي المستخدمين.

أبو عمر المصري

واحد من المسلسلات اللي عملت قلق ومشاكل كتير. بداية من اعتراض دولة السودان على أحداث المسلسل اللي بتظهرها بشكل غير جيد، نهاية بغضب المؤلف عز الدين شكري فشير من عدم إدراج اسمه على تترات المسلسل. لكن هل المسلسل يستحق كل الضجة دي؟ الحقيقة المسلسل فعلًا من أقوى الأعمال اللي بتعرض السنة دي.

بيشارك عز بطولة المسلسل أروى جودة ومنذر ريحانة وفتحي عبد الوهاب.

أداء أحمد عز التمثيلي قوي ومميز، والمسلسل مكتوب بطريقة جميلة ومبتكرة، لكن عندنا اعتراض على تنفيذ مشاهد الأكشن واللي حسينا فيها باستسهال واتباع للأسلوب القديم في الاشتباكات (المجرم ياخد ضربة واحده على دماغه يقع مايقومش)…إلخ

الوصية

ومن الأكشن والمغامرات للكوميديا غير المتوقفة… أكرم حسني وأحمد أمين في دويتو كوميدي جديد. القصة مكررة عن أب بيموت وبيسيب وصية صعبة لأبنه المستهتر. لكن المواقف الكوميدية اللي بيقدمها الدويتو ده قوية ومميزة.

بنعيب على المسلسل إظهاره للشخصيات اللي فيه بدون مجهود كوميدي إضافي، يعني كأننا بنشوف اسكتشات كوميدية قديمة لأحمد أمين أو مقاطع لأبو حفيظة. لكن بشكل عام ده مش مأثر على سير الكوميديا بشكل عام.

بيشارك أمين وحسني في بطولة المسلسل ريم مصطفى وسارة سلامة وأيمن وتار وبيومي فؤاد

ملاحظة أخيرة:

لو زهقت من مشاهدة المسلسلات على التليفزيون وانتظار مواعيد العرض والأعلانات والفواصل الإعلانية، ممكن تتفرج على يوتيوب في الوقت اللي تحبه بدون إعلانات وبطريقة شرعية تمامًا من خلال الصفحة دي.

مقترح