The Definitive Guide to Living in the Capital , Cairo , Egypt

 من 3 سنين ظهر برنامج الصدمة واللي كان بيتصور في 3 دول عربية علشان يخلينا نشوف تصرف الناس في مواقف إنسانية، وسنة وراء سنة زاد تعلق الناس بالبرنامج، والسنة دي بنشوف الموسم الثالث منه، وبنتأكد إن لسه القلوب فيها خير وجدعنة وشهامة أكتر من ما كنا نتصور. وده اللي شوفناه بشكل واضح في أكتر من حلقة من البرنامج.

البرنامج زي كل سنة بيتصور في الشارع أو في محل، وبيعتمد على ممثلين يمثلوا مشهد ممكن كل الناس تشوفه في حياتهم اليومية، بس الفرق في التعامل معاه، وبيحاولوا دايمًا يوصلوا أهمية قيمة المشاركة ويظهروا هل فعلًا الناس لسه عندها قيم وقلبهم مليان رحمة ولا كل واحد مركز في همومه وبس. والحقيقة إن رد فعل الناس خلانا نحس إن لسه فيه أمل ولسه في قلوب طيبة ما تستحملش تشوف حد في موقف محرج وماتساعدوش.

القلب على القلب رحمة

كتيير مننا ممكن يتعرضوا لموقف إنهم يلاقوا حد بيطلب مساعدة مالية في الشارع، بعضنا بيفتكروا إنه نصاب أو حد مكسل يشتغل وبيتكسب من طلب المساعدة وده فعلًا بيحصل كتير. لكن الغريب إن  في حلقة الطفل الصغير اللي باباه ومامته منفصلين ومامته عاوزة ترجعه لوالده اللي بيضربه. رد فعل الناس كان قوي في رفض أي عنف ضد الطفل، لدرجة أن البعض ضربوا الأب اللي بيعنف إبنه بطريقة مهينة. وبالرغم من إننا المفروض في مجتمعات نامية بتنتهك فيها الحقوق الإنسانية كل يوم إلا إن البرنامج وضح إن مافيش إنسان سوي في قلبه رحمة يقبل يشوف موقف من المواقف دي بدون ما يتدخل.  وممكن تشوفوا الحلقة هنا.

الجدعنة في دمنا

حلقة سواق التاكسي المصري اللي حاول ياخد شنطة الست غصب في الشارع لما مارضيتش تدفع، أو حاول يحجز الطفل في لبنان، كانت صدمة فعلًا لأن الناس ما سكتتش ودافعت عن الست بقوة بالرغم من إن ده فعلًا موقف بيتكرر كل يوم بطريقة غريبة، إلا أنه أثبت إن الجدعنة سمة أساسية في كتير من البشر، حتى لو جم حبة تراب وسلبية غطوها شوية. وتقدروا تشوفوا الحلقة هنا.

دعوة الحماة للسماء

برضه في حلقة الحماة اللي بتهزق مرات ابنها، رد فعل الناس خد وقت شوية لحساسية الموقف، بس الناس ما استحملتش تشوف حد بيتهان وماتساعدوش. وممكن تشوفوا لينك الحلقة من هنا.

برنامج الصدمة خلق جوانا حالة من الاستعداد إننا نساعد أي حد، وإننا نعيد تفكير في كل اللي بيحصل حوالينا من أمور، البرنامج بين لنا كمان إن المعدن الأصيل مهما يعدي عليه الزمن ويمر بأزمات هيفضل على أصله بيلمع وقوي ومتين بيبان بجد في وقت الشدة.