The Definitive Guide to Living in the Capital , Cairo , Egypt

تليفزيون
بنات سوبر مان

بنات سوبر مان: مارفل بالخلطة المصرية

  • كوميدي
  • من الآن
تم التقييم بواسطة
Ahmed Abd El Gawad
قيم
قيم الآن
بنات سوبر مان: مارفل بالخلطة المصرية

مارفل:

كلنا عارفين شركة (مارفل) اللي صنعت في عقول جيل كامل فكرة البطل الخارق، اللي بينقذ الأرض (والبنات الحلوة) على طول، مين فينا ماتفرجش على سوبر مان وبات مان وسبايدر مان، وكات وومن، مين فينا ماتعلقش بيهم وكان نفسه يطير زيهم، أو يبقى عنده جزء من قوتهم علشان يخلص كل مشاكله.. مارفل شركة كبيرة عندها قدرة تسويقية عالية وفريق عنده مهارة الابتكار، الفيلم اللي بيطلع مش مجرد فيلم سينما وخلاص، ده وراه فريق عمل ضخم وناس بتسوق الفكرة وبتنتج معاها لعبة وأبليكشن وصفحات على الفيس بوك وعالم تاني ناقص لنا كتير علشان نوصل له.

البنات:

إحنا بقى في مصر قررنا نعلي على (مارفل) ونخلي سوبر مان يتجوز من مصرية تحديدًا (انتصار) واللي خلفت منه وبقى عنده بنات، وعملنا مسلسل بنات سوبر مان الكوميدي (صراحة) مانقدرش ننكر إنه بيضحك ودمه خفيف وتقدر تخلي العائلة تتفرج معاك عليه، بالذات إن أبطاله قريبين من المشاهد وليهم تيمة كده في تمثيلهم بتخليك تحس أنك بتتفرج على ناس تعرفها قبل كده مش ممثلين، وهما (يسرا اللوزي – شيري – ريهام حجاج – بيومي فؤاد – انتصار – كريم عفيفي) أكيد طبعًا التوليفة دي مش هتعمل حاجة سيئة من ناحية (الضحك) يعني هتضحك هتضحك.. لكن السؤال هنا هل الملسل قدم قيمة.

القيمة:

لو قررنا نسأل السؤال ده في مسلسل سوبر مان إيه القيمة اللي بتتقدم لنا فيه يعني فكرة العمل إن سوبر مان كان نازل مصر في مهمة خاصة.. وفجأة قرر يغير وجهته ويروح شارع الهرم (الحبكة هنا فيها مشكلة) حتى لو ماشيين بمبدأ خيالي بحت، كان لازم نخلي بالنا من فكرة البطل الخارق اللي بيدعو لقيم عليا، مش رايح شارع الهرم، وبناته هيشتغلوا في النصب، وبيومي فؤاد (خال البنات) تقدر تقول رئيس عصابة قراري، بيخليهم يفتنوا على بعض، في حالة طبعًا مضحكة، لكن في نفس الوقت بتخليك تغير وجهة نظرك على فكرة البطل الخارق.

البطل الخارق:

هنا بقى لينا وقفة تانية مع البطل الخارق، شركة (مارفل) لما بتعمل حاجة لها علاقة بالمؤثرات البصرية بتبقى حاجة للزمن يعني فيلم بتقعد الناس تتكلم عن كمية الإبهار البصري اللي فيه، لكن في المسلسل واضح أن فيه شركة عادية هي اللي تولت عمليات الخدع البصرية، ركز على المصطلحين لأن ده مهم، فى أوروبا وأمريكا اسمه (إبهار بصري) بس عندنا اسمه (خدع بصرية) يعني محاولة مني إني أخدع عينك مش أبهرك.. وده بالضبط اللي حصل في بنات سوبر مان، هي محاولة كويسة للخدع لكنها مش موفقة وفيها أخطاء تقنية كتير وباين جدًا إقحام (الجرافيك).

القصة:

الحدوتة حلوة وفكرتها كانت ممكن تجيب ضحك أكت من كده وخيال عالي كمان، كفاية إن سوبر مان نزل مصر، دي لوحدها كوميديا، بس حتى لما عملنا مزاوجة بين الغرب وقصصه وبيننا ضحكنا على نفسنا وسخرنا من فقرنا.. والعمل في مجمله ناجح في فكرته وقدرته على انتزاع الضحك.. لكن كديكورات وإخراج وخدع وزوايا تصوير نقدر نقول (متوسط).

عجبك ؟ جرب

صد رد

نصيحة 360

مسلسل بنات سوبر مان من بطولة يسر اللوزي – شيري – ريهام حجاج – بيومي فؤاد – انتصار – كريم عفيفي، وأشرف على كتابة ورشة الكتابة أحمد شوقي وكريم بشير، هاتلاقوه الساعة 6 على  mbc مصر – 7 على mbc مصر 2.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح