Mohamed Hamdy
شركات الاتصالات كل سنة بتقدم إعلاناتها المميزة في رمضان. ودايمًا بيكون في تنافس بينهم في جودة وقوة الإعلان. تابعنا إعلانات السنة دي، وقولنا نشوف أهم النقط الإيجابية والسلبية اللي فيهم:
أورانج: خليك إيجابي
أورانج راجعة لنا السنة دي بإعلان بيجمع نانسي عجرم وتامر حسني. اثنين من ألمع الأسماء في عالم الفن في المنطقة العربية بالكامل. الإعلان السنة دي بيتكلم عن أهمية التفكير الإيجابي وإزاي تصرف صغير ممكن يعمل فرق كبير.
الإعلان بيركز على التصرفات الصغيرة اللي بنعملها، وتفرق في حياة الناس. ممكن التصرف ده يكون مجرد كلمة حلوة. أما أحلى ما في الإعلان فعلًا، كان ظهور الفنان مصطفى هريدي. واللي شارك تامر في فيلم (عمر وسلمى).
لكن ماعجبناش في الإعلان أن مستواه أضعف من إعلانات السنين اللي فاتت. خاصة الإعلانات اللي كانت بتركز على قطاعات مختلفة في مصر، زي النوبة والصعيد والدلتا.
فودافون والهضبة: أنا مهما كبرت صغير
فودافون مكملة السنة مع فكرة اللمة. وبتستعين بالهضبة عمرو دياب ومجموعة من الفنانين الكبار.
أحلى حاجه في الإعلان كانت الإستعانة بشخصيات عادية. زي قرايب عمرو دياب، وناس من صحابه البعيدين عن الوسط الفني. طبعا الكل كان مذهول من فارق الشكل بين عمرو وصحابه، رغم قربهم في السن.
ظهر في الإعلان عدد من النجوم منهم النجم عزت أبو عوف، ريهام عبد الغفور، منة شلبي. وكمان أحمد مالك، اللي ظهور عمل حالة استغراب على السوشيال ميديا.
إتصالات: ليفل الوحش في تحدي أقوى كارت
إتصالات أخدت تحدي أقوى شبكة لمرحلة جديدة خالص، واستعانت المرة دي بالنجم “فان دام” مع محمد رمضان. وظهر “فان دام” بشكل مختلف تمامًا، عن شكله اللي متعودين عليه.
عجبتنا الديكورات اللي كان شكلها مستوحى من أفلام فان دام الشهيرة زي Street Fighter – No Retreat, No Surrender وغيرهم. اللي حققت شهرة كبيرة في مصر وسابت بصمتها مع أجيال كتيرة.
صحيح اتصالات بتلعب على فكرة التحدي، لكن ماحسيناش الإعلان ده بنفس قوى إعلان السنة اللي فاتت. رغم وجود نجم عالمي فيه زي “فان دام”. الأغنية ماكانتش بنفس قوة “أقوى كارت في مصر”، اللي فضلت تشتغل في الأفراح والمناسبات طول السنة.
مشاهدات يوتيوب
لحد كتابة المقال ده، تفاوتت مشاهدات الإعلانات على يوتيوب. إعلان أورانج: 7 مليون مشاهدة. إعلان فودافون: 23 مليون. وإعلان اتصالات: 25 مليون.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
