The Definitive Guide to Living in the Capital , Cairo , Egypt

عن الجبل:

جبل الحلال موجود فى شمال سيناء.. وبـ يبعد تقريبًا ٦٠ كم جنوب العريش.. وتم تسميته بالاسم ده لأنّ كلمة «الحلال» معناها «الغنم» عند بدو سيناء، والجبل ده كان أحد أشهر مراعيهم، لكن برضه كان بـ يحصل فيه حاجات ثانية.

الجبل والعشق:

عشقت الجبل عشق ما أقدرش أبعد عنه.. اتعلمت الرجولة والهيبة منه بس خوف الناس منى.. جذورى ممدودة حسب ونسب وشجرة عيله اسمى منصور محمد عبد الرحمن عبد الغفار أبو هيبة.

الجذور:

بـ يقولوا أن جذورنا ممدودة فى المغرب والأندلس والحجاز ومعظهم اشتغل فى التجارة وكانوا مع الهلالى فى تونس.. اتعلمت كل حاجة شمال بس شمال أبو هيبة له قانون.. عديت بالسلاح وهربته وسافرت السودان ولما زرعت وحفرت فى الأرض لاقيت آثار وكإن الشمال مستقبل الأساسى وعشقت جبال كثير “جبل علبة وموسى والعوينات وجبل الحلال”.

لعبة عبد العزيز:

دى البداية اللى لعبها المبدع “محمود عبد العزيز” وحكى لنا فيها عن أبو هيبة وعيلته ومراته اللى بـ يحبها جدًا وبنت عمه “وفاء عامر” اللى مثلت دور “غنيمة” وبناته الثلاثة وسفره الكثير وتجارته فى الآثار، وفى الأحداث هـ نلاقى إثارة وأعداء أشهرهم هو (كين أو جدعون/ طارق لطفي)، وهو من غجر مصر اللى كانوا عايشين فى  الصعيد، وجد (أبو هيبة) طردهم من قرية (الكوامل) علشان خايف على عيلته من الغجر.. وبـ يتعرض (أبو هيبة) لمحاولة اغتيال كانت هـ تموته، بـ يخرج منها وهو مقرر تغيير الطريقة اللى كان بـ يعيش بها حياته.

الموسيقى:

قبل أى حاجة لازم نقول أن الموسيقى التصويرية لازم تأخذ تحية كبيرة جدًا لأنها بالفعل هائلة جدًا وهى مبدئيًا أوركسترا كاملة بـ تلعب فى الخلفية وواخدة الروح الأوربية شوية لكنها عاملة فرق كبير.

الطريقة:

الطريقة  اللى بـ يلعب بها الممثلين لازم نقف أمامها شوية ونقول أن فيه طريقة جديدة فى الأداء خاصة محمود عبد العزيز اللى لعب رجل الجبل بشكل جديد وعبقرى وكمان طارق لطفى اللى لعب دور صعب جدًا وهو الغجرى اللى من أصول غجرية مصرية واللى بـ يقرأ الكف لكن بشكل جديد وكمان لازم نقول أشرف عبد الغفور اللى لعب دور الأخ الغيران اللى عاوز يأخذ مكانه.

المشاهد مش مكررة، مختلفة وفى أماكن كثير فى دول مختلفة وشخصيات مختلفة والسرعة فى الحلقات، والمقدرة على أخذ الكادرات وتصحيح اللهجة الصعيدى المضبوط مع الموسيقى التصويرية من أكثر الحاجات اللى هـ تشدك فى المسلسل.

علشان تعرف مواعيد وقنوات عرض “جبل الحلال” زور “دليل كايرو 360 للتليفزيون فى رمضان“.