The Definitive Guide to Living in the Capital , Cairo , Egypt

تليفزيون
جويل

جويل: برنامج موضة وماكياج راقي مشبع بالأنانية

  • عائلي
  • من الآن
  • عمار ورد
تم التقييم بواسطة
Cairo 360
قيم
قيم الآن
جويل: برنامج موضة وماكياج راقي مشبع بالأنانية

برنامج زاخر بالأنانية.. لو حابين تتفرجوا على برنامج “الأنا” فيه عالية جدًا يبقى “جويل” هو البرنامج الأمثل، حب النفس مش حاجة وحشة، والأنا مش عيب، مادمت بـ تعترف بالآخرين، لكن لما يبقى الموضوع من أوله لآخره “أنا” وطز في الثانيين ومشاعرهم ومظهرهم، يبقى الموضوع بقى سخيف، وهو ده اللي حاصل مع برنامج “جويل”.

“الأنا” بادئة مع اسم البرنامج اللي على اسم مقدمته ومعدته جويل مردينيان، أول مشاهد بداية من التتر والفقرات الأولى بـ تكون في صالون التجميل الخاص بها، مع موظفيها، اللي بـ تبدأ تعطيهم التعليمات، في البرنامج ده لا صوت يعلو على صوت جويل، حتى الضيوف اللي بـ تبدأ في تجميلهم وعمل ماكياج وتغيير لمظهرهم ما لهمش رأي في اللي بـ يحصل لهم، وأكثرهم بـ يكونوا في المشاهد الأخيرة مصدومين من منظرهم، بعضهم ما بـ يعجبوش وبـ يسكت علشان يمشي البرنامج وبعضهم بـ يتكلم ويقول صراحة أن التغيير ما عجبوش زي أحد المذيعات اللي جويل غيرت لهم شكلهم وما عجبهاش التغيير.

أسخف وأسوأ حاجة في البرنامج هو المشهد اللي بـ ييجي فيه البنت قبل وبعد، طبعًا قبل من غير مكياج ووشها تعبان وشكلها صعب، وبعد ما حطت الماكياج والصبغة والذي منه، بـ يكون مشهد صعب أوي، ده طبعًا غير وجهة النظر اللي بـ يصدرها البرنامج طوال الوقت عن أن قوة الشخصية وأهمية البنت ما بـ يكونش غير من خلال الماكياج، وشكل الشعر، مش بصفاتها وقوتها، صورة بـ تخلي كثير من الضيفات يقولوا أنهم قبل الماكياج كانت شخصيتهم ضعيفة ومش واثقين في نفسهم وبعد الماكياج والتغيير الموضوع اختلف تمامًا، الطريف بقى أن جويل نفسها ما بـ تحبش تظهر بشكلها قبل وبعد، حتى لما تيجي في مرات ويتم عمل مكياج لها أمام الكاميرا، ما تحبش تظهر وتحط أيديها أمام الكاميرا علشان تمنعها من التصوير.

الفكرة الأساسية للبرنامج أن فيه سيدات كثير عاوزين يغيروا شكلهم تمامًا، ده الدور اللي بـ تقوم به جويل اللي بـ تختار كل حلقة ثلاث سيدات تعمل لهم الماكياج وتبينهم في  صورة مختلفة، وجزء كبير من الحلقة بـ يضيع في الـ Wow والأووووووووه اللي بـ تبديها الضيفات على شكلهم بعد التغيير، رغم أن الماكياج والشكل الجديد لأكثرهم بـ يكون عادي، حتى قصات الشعر لاحظنا أن بعضها قديم حبتين تسعينيات وثمانينيات.

في كل حلقة فقرات متنوعة بـ تيجي كفواصل عقبال ما الضيفات الثلاثة يحصل التغيير اللي في شكلهم، الفقرات بـ تكون عن تغيير الشعر، والتسوق و الأزياء، وكل ده طبعًا بـ تقوم به جويل والكاميرا وراءها.

أفضل حاجة في البرنامج مجموعة من النصائح اللي بـ تقدمها جويل للرجل والمرأة فيما يتعلق بالشكل اللي المفروض يكونوا عليه في المناسبات المختلفة زي مقابلات الشغل والمناسبات الاجتماعية والشخصية، البرنامج مش كله سيئات طبعًا، في النهاية هو شيق، وبـ يكون عندنا فضول نتفرج من الأول للآخر على التغيير حتى لو كان ده من باب النقد وأحيانًا التعلم، بعض أسئلة البنات والسيدات اللي بـ يتم تغيير شكلهم في الحلقة بـ تكون مفيدة زي أسئلتهم عن السواد اللي حول العين، الشعر اللي بـ يقع، الذقن الرفيعة، وغيرها كثير من الأسئلة الشائعة، ومن مميزات البرنامج التعاون اللي بين جويل وبعض أطباء الأسنان والجلدية والتجميل اللي بـ يشاركوها ببعض التغييرات اللي بـ تعطي المشاهد فكرة عن حاجات كثير أبعد من مجرد الماكياج والشعر.

ما ننكرش كمان أن جويل شاطرة وذكية وعندها معلومات، البرنامج بـ يتصور داخل  الأوتيلات الفاخرة، والمولات الضخمة، حياة مرفهة، كلها دلع، ما تحسش بالملل وأنت بـ تتفرج، البرنامج ككل ملهم، ويخلي أي بنت أو ست تتفرج عليه تقوم مباشرة وتبدأ تفكر إزاي هـ تبدأ تغير من مظهرها وتفكر في نفسها أكثر، وتعيد نظر في كثير من العادات اللي بـ تتبعها في حياتها واللي ممكن تكون بـ تؤذي عينيها أو وجهها.

عجبك ؟ جرب

"التفاح الأخضر"، و"ستايل" على نفس القناة mbc.

نصيحة 360

البرنامج بـ يعرض على قناة mbc الساعة 10 صباحًا، والإعادة 8 مساءً من إخراج عمار ورد، لو عاوزة تعيدي نظر في اللوك بتاعك وتفكري تغيري مظهرك وتخلي بالك على نفسك، ننصحك بمشاهدة البرنامج ده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح