The Definitive Guide to Living in the Capital , Cairo , Egypt

“تطوير الخطاب الديني” الجملة دي دائمًا بـ نسمعها وسط أمنيات كثير لرجال الدين والدعاة اللي كلهم بـ يشتكوا من فكرة أن الخطاب الديني متجمد ومش بـ يتطور ويواكب روح العصر، ساعات كنا نقعد نسأل نفسنا، يعني إيه تطوير الخطاب الديني؟ لحد ما شوفنا برنامج “خطوات الشيطان”، فهمنا بجد يعني إيه معنى جملة ” خطاب مواكب لروح العصر”.

معز مسعود بـ يتفوق على نفسه كل سنة عن اللي قبلها، و بـ يعرفنا بجد إزاي داعية ديني ممكن  يطور من نفسه حتى لو اللي حوله مش بـ يتطوروا، البرنامج السنة دي عبارة عن برنامج داخل مسلسل، المسلسل بـ يتعرض لحياة شاب بـ يشتغل في مجال البورصة وسوق الأوراق المالية، يعني في قلب مليون احتمال للمعصية كل يوم.

المسلسل أبطاله متنوعين، ناس بذقن وبنات محجبات وبنات بشعرهم وشباب عادي،  المثل بـ يقول: “اللي على الشط عوام”، يعني اللي بعيد عن الموضوع يقدر يقول نظريات ويتكلم كثير في اللي المفروض يتعمل لكن لو اتحط داخل التجربة يمكن ما يعرفش يتصرف، هي دي بالضبط فكرة البرنامج، كثير من الدعاة بـ يفضلوا يقولوا في كلام مرسل عن الحلال والحرام وأسس الدين الصحيح، لكن معز حب يدخل التجربة مع شاب من الشباب علشان يبقى قريب من المواقف العملية اللي بجد الواحد بـ يكون فيها مزنوق ومش عارف يتصرف رغم أن المسألة ممكن تتعلق ببديهيات زي عدم الكذب والأمانة وغيره.

الكلام حاجة والفعل حاجة، إزاي الواحد ممكن يتبع ضميره ويخسر رغم أن كل اللي حوله بـ يكسبوا وبـ يخالفوا ضميرهم، صراع كثير الواحد بـ يقع فيه لما ما يقدرش يوفق بين احترامه لدينه وقيمه وبين تنفيذ كلام الرؤساء وإحراز نجاحات أحيانًا بـ تكون كذب، بس علشان ما يبقاش فيه عقوبة أو خصم أو توبيخ.

مواقف كثير بـ يعرضها برنامج ومسلسل “خطوات الشيطان”، طبعًا مش هـ ننسى نقول أن الموسيقى أكثر من رائعة ما تفرقش كثير عن موسيقى تتر السنة اللي فاتت، تسلسل البرنامج بـ يكون عبارة عن موقف درامي لمشكلة أخلاقية أو دينية، وبعدين ييجي معز مسعود وهو قاعد بـ يتكلم مع البطل وبـ ينصحه.

“اللي عاوز يبقى كذاب لازم تبقى ذاكرته كويسة جدًا” نصيحة تبدو وحشة لكن حقيقية وبـ تثبت أن الكذب صعب جدًا، لكنه مستمر وبـ يخلي مافيش أي شكل من أشكال الثقة بين البشر، كثير بـ يعتمدوا على “الكذب الأبيض” في تمشية الأمور، كل واحد عاوز يبقى شكله كويس وأحسن واحد، حتى لو بمعصية نتيجتها مش زي ما الواحد يتمنى.

اختلفت التقييمات للمسلسل بشكل عام، فيه إعجاب شديد به باعتباره فتح في عالم البرامج الدينية لكن فيه بعض الآراء شايفة أنه قريب من برنامج “بين الناس” بتاع جمال الشاعر وأنه محاولة لتقديمه بشكل جديد… في النهاية لازم نعترف أن معز واحد من أفضل الدعاة الجدد برأينا خاصة مع آراءه الجريئة جدًا في عالم السياسة في الوقت اللي تجاهل كثير من الدعاة الجدد الأحداث علشان ما حدش يتهمهم أنهم مع أو ضد فريق وما يخسروش حد من جمهورهم، كمان بـ يثبت كل يوم أنه فاهم قوي المشاكل اللي بـ يقع فيها الشباب وأنه عارف يعني إيه ضغوط الحياة والشغل، عارف الأسئلة الكبيرة اللي بـ تطرح نفسها على عقول كثيرة من غير أجوبة، وده اللي حاول يجاوب عليه من خلال حلقات برنامجه  العام الماضي، ومن الأسئلة الكبيرة عن ربنا والكون والشيطان بدأ ينتقل لتفاصيل صغيرة لكن مهمة جدًا في برنامج السنة دي.