The Definitive Guide to Living in the Capital , Cairo , Egypt

رمضان بيجمع الكل في البيوت أمام شاشة التليفزيون وعلى الإفطار والسحور، وفي ظل الأجواء الحالية اللي اتسبب فيها انتشار فيروس “كورونا” في عالمنا، بنطلب منكم تفضلوا في البيت وماتخرجوش، وتساعدوا نفسكم وبلدكم في الحفاظ على صحتكم.

وعلشان يهمنا تقعدوا مبسوطين في البيت، هنقول لكم في السطور الجاية على 3 برامج مقالب جديدة هتعرض في شهر رمضان 2020، وأكيد البرامج دي هتكون قادرة تبسطكم.

رامز مجنون رسمي

السنة دي، وزي كل سنة، رامز جلال هيظهر في برنامج المقالب اللي بيقدمه، واللي هو الأشهر والأول على مستوى الوطن العربي، وعرض السنة دي عنوانه “رامز مجنون رسمي”، والبرنامج السنة دي اتصور كله في دبي، والتصوير انتهى من فترة قبل إغلاق المطارات والسفر بين الدول.

البرنامج هتعرضه قناة إم بي سي مصر بعد الفطار.

 

خلي بالك من فيفي

بعد ما ظهرت في برامج مقالب كتير كضيفة، هتقدم الفنانة فيفي عبده السنة دي، برنامج مقالب هتشاركها في تقديمه الفنانة المغربية زينب عبيد.

وبتعتبر تجربة برنامج “خلي بالك من فيفي”، أول تجربة مقالب لفيفي عبده، وفكرة البرنامج بتدور حوالين استضافة فيفي للضيوف في بيتها علشان برنامج فني اجتماعي، لكن بتبدأ الأحداث تروح للمقالب اللي بتخوف الضيوف ويخرج منهم ردود فعل مختلفة.

البرنامج هتعرضه قناة إم بي سي 5.

محدش فاهم حاجة

الفنان الكوميدي محمد ثروت هيقدم لنا السنة دي برنامج مقارب لبرامج الكاميرا الخفية اللي كتير من المصريين مرتبطين بيها، والبرنامج مش هيستضيف نجوم كضحايا زي أغلب برامج المقالب. لكن ضحاياه هيكونوا من الجمهور العادي.

البرنامج هتعرضه قناة إم بي سي مصر.