The Definitive Guide to Living in the Capital , Cairo , Egypt

دليلك الكامل لأهم برامج رمضان 2019
بواسطة
Cairo 360

رمضان خلاص هل هلاله. كالعادة مع رمضان بتكتر العروض والمسلسلات المختلفة. وكمان بتكتر البرامج من توك شو لمسابقات لبرامج ترفيهية وغيرها. فتعالوا نتعرف على أهم برامج رمضان 2019، علشان تحددوا من النهارده هتتفرجوا على إيه من برامج رمضان:

رامز في الشلال

زي كل سنة رامز جلال بيطل علينا ببرنامج مقالب جديد، السنة دي هيقدم “رامز في الشلال”. وفيه بياخد الضيوف لمكان في جزر شرق آسيا، ويركبوا مركب في الشلالات. وطبعًا هيكون في صريخ للصبح. هيتعرض على MBC.

هاني في الأدغال

الفنان هاني رمزي هيخش السباق الرمضاني ببرنامج “هاني في الأدغال”. واللي كان انسحب منه رمضان اللي فات، بسبب تسريب فكرته. التفاصيل اللي صرحت عنها الشركة المنتجة، إنه هيستضيف المشاهير لمكان بعيد. وهتكون المفاجأة وقوعهم في حقل ألغام. هيتعرض على قناة ON E.

شيخ الحارة

بتواصل الإعلامية بسمة وهبة، تقديم الموسم الثالث من برنامج “شيخ الحارة”. واللي فيه بتستضيف النجوم ويتكلموا عن أسرار حياتهم الشخصية. البرنامج كان عامل ضجة كبيرة الموسمين اللي فاتوا. وهيتعرض على القاهرة والناس.

اسم من مصر

الإعلامي جورج قرداحي هيقدم برنامج “اسم من مصر”، واللي لم يتم الكشف عن أي تفاصيل خاصة به. وهيتعرض على قنوات: DMC – CBC – ON.

سيرة الحبايب

البرنامج بيقدمه الإعلامي عمرو عبد الحميد، والفنانة المغربية جيهان خليل. وفيه بيتم استضافة نجوم الفن والكورة، والكلام عن حياتهم الشخصية. هيتعرض على قناة TEN.

عايشة شو

الإعلامية التونسية عائشة عثمان بوجبل، هتقدم برنامج “عايشة شو”. اللي بتستضيف فيه النجوم وتتكلم معاهم عن مواضيع مختلفة. هيتعرض على قناة: النهار – القاهرة والناس.

حلم الأبطال

البرنامج الرياضي “حلم الأبطال”، بيقدمه: أحمد حسام – عماد متعب – رضا عبد العال – روبي كين. وفيه كل واحد بيتولى تدريب فريق، علشان يأهله لبطولة كورة خماسية بينظمها البرنامج. هيتعرض على صدى البلد.

رحلة الحياة

ندخل في البرامج الدينية مع “رحلة الحياة”، اللي بيقدمه الداعية مصطفى حسني. وبيتكلم عن الصعوبات اللي بتواجهنا في الحياة. هيتعرض على ON E.

رحلة الحقيقة

الدكتور عمرو الورداني هيقدم برنامج “رحلة الحقيقة”. عبارة عن رحلة بيخوضها مع مجموعة من الشباب، للبحث عن مفهوم الحياة بالنسبالهم. هيتعرض على قناة TEN.

زدني علما

الدكتور حسام موافي هيقدم برنامج “زدني علما” على صدى البلد.

مقترح