The Definitive Guide to Living in the Capital , Cairo , Egypt

دليل كايرو 360 لأهم مسلسلات رمضان 2019
بواسطة
Omar Abd-elmaqsoud

كل سنة وأنتم وإحنا طيبين بمناسبة رمضان اللي خلاص على الأبواب، وكعادة كل سنة مع الفوانيس والزينة، بنستنى نجومنا تطل علينا، من شبابيك الدراما والشاشة الفضية، وزي ما أيام رمضان بتتسابق علشان تخلص، كمان سباق الدراما بيبتدي معاه وبيخلص معاه، والنهارده، هنحاول في كايرو 360 نستكشف معاكم أهم محطات قطر الدراما الرمضانية السنة دي:

  • زلزال

“زلزال” هو المسلسل اللي هيدخل بيه الفنان “محمد رمضان” المارثون الدرامي لرمضان 2019 ، وبتدور أحداث المسلسل في إطار من التشويق والإثارة، وهيشاركه البطولة الفنانة “حلا شيحة” واللي هيبقى أول عمل ليها بعد رجوعها من الاعتزال، ده غير نسرين أمين، وماجد المصري، وأحمد صيام، وغيرهم.

المسلسل من تأليف “عبد الرحيم كمال” وإخراج “إبراهيم فخر الدين” وغناء تتر المسلسل هيكون للفنان “أحمد شيبة”.

  • هوجان

المسلسل ده من بطولة الفنان “محمد عادل إمام”، اللي بيدخل السباق الرمضاني هذا العام بمسلسل هوجان، واللي تصنيفه كوميدي وبتدور أحداثه في إطار استعراضي للعضلات والقوة الخارقة.

المسلسل هيشارك في بطولته مجموعة كبيرة من النجوم الشباب منهم كريم محمود عبد العزيز، وعمر مصطفى متولي، وأسماء أبو اليزيد، وعبير صبري، وهاجر أحمد، وأحمد التهامي، ومحمد أسامة، وأوس أوس، بالإضافة إلى النجم صلاح عبد الله.

المسلسل من تأليف “محمد صلاح العزب” وإخراج “شيرين عادل” و إنتاج “سينرجي – تامر مرسي” .

  • لمس أكتاف

وده المسلسل اللي هيشارك بيه الفنان “ياسر جلال” في السباق السنة دي، وهيشارك في بطولته مجموعة مميزة من الفنانين، منهم فتحي عبدالوهاب، وكرم جابر، وإيمان العاصي، وكارولين خليل، وسمر مرسى، ومحمد عز، وخالد كمال، وهبة عبدالغني، وحنان مطاوع، والمسلسل بيحكي عن “أدهم” الملاكم اللي هيدخل في حدوته كبيرة، لكن لما يقرر يرجع ويعيش عيشة مستقرة، مش هيتهنى بيها.

المسلسل من تأليف “هاني سرحان” وإخراج “حسين المنباوي”

 

  • ولد الغلابة

أحمد السقا هيغير جلده ولونه في سباق السنة دي، وهيبقى “ولد الغلابة” في رمضان 2019، وهيقدم من خلاله شخصية صعيدية هتتعرض لمواقف مش هتتناسب مع طبيعة عادتها وتقاليدها.

بتدور أحداث المسلسل في إطار إجتماعي، بمشاركة مجموعة كبيرة من النجوم زي مي عمر، وإنجي المقدم، وإدوارد، وكريم عفيفي، وهبه مجدي، ومحمد ممدوح، وصفاء الطوخي، والوجه الجديد مي سامي أخت المخرج محمد سامي.

(ولد الغلابة) للمخرج “محمد سامي” وإنتاج “صادق أنور الصباح”.

 

  • قمر هادي

“قمر هادي” قالب جديد هينافس بيه النجم “هاني سلامة” في مسلسلات رمضان 2019.

أحداث المسلسل فيها تشويق وغموض، مختلف عن كتير من المعروض على الشاشة أو اللي قدمه “هاني سلامة” قبل كده، وهيشاركه في التمثيل، داليا مصطفى، ويسرا اللوزي، ومحسن محيي الدين، ونورهان، ومريم حسن، وهادي الجيار، وحمزة العيلي، وهاجر عفيفي، وآية سماحة، وهايدي رفعت، وكريم سرور، وأحمد ثابت، ومراد مكرم.

المسلسل من تأليف “إسلام حافظ”، وإخراج “رؤوف عبد العزيز”، وإنتاج شركة (سينرجى – تامر مرسي)

 

  • ابن أصول

حمادة هلال كمان هيشارك في مسلسلات رمضان السنة دي من خلال مسلسل “أبن أصول” اللي هيشاركه في بطولته سوزان نجم الدين وأيتن عامر وعماد رشاد وإيناس كامل ومحمد نجاتي

المسلسل من تأليف “أحمد محمود أبوزيد” وإنتاج (سينرجي – تامر مرسي) وإخراج “محمد بكير”.

 

  • الزوجة الـ 18

(الزوجة الـ 18 ) هتكون المشاركة اللي هيثبت بيها الفنان حسن الرداد حضورة في ماراثون الدراما الرمضانية السنة دي، بمشاركة باقة كبيرة من الفنانين على رأسهم سلوى خطاب، وناهد السباعي، وشيماء سيف، وهيدي كرم، ومحمود البزاوي، ومحمود الليثي، وآية سماحة، وكوكي، وإيناس كامل، إلى جانب عدد من ضيوف الشرف،

المسلسل من إنتاج (ممدوح شاهين)، وتأليف محمد أبو السعد، وخالد أبو بكر، وليد أبو المجد، وإشراف على الكتابة أمين جمال وإخراج “مصطفى فكرى”.

 

  • أبو جبل

وده اسم المسلسل الجديد اللي هيدخل بيه النجم “مصطفى شعبان” علينا السنة دي، واللي بيحكي عن أزمات عيلة (أبو جبل) اللي هتتسبب في تفكك العيلة اللي هيحاول “مصطفى شعبان” انه يجمعها في إطار درامي كوميدي.

هشارك مصطفى شعبان في البطولة، الفنانين دياب، ونجلاء بدر، ومريم حسن، وعائشة بن أحمد، ومحمود البزاوي، ومحمد علي رزق، وعايدة رياض، وناهد رشدي، ومصطفى درويش، وأنعام الجريتلي، وغفران محمد.

المسلسل من إخراج “أحمد صالح” وتأليف “محمد سيد بشير”.

 

  • فكرة بمليون جنيه

نجم “مسرح مصر” الفنان الكوميديان “علي ربيع” هيشارك السنة دي  بتاني بطولة مطلقة ليه في مسلسل “فكرة بمليون جنيه”، واللي بتدور أحداثه في إطار كوميدي حولين فكرة البحث عن الفلوس.

المسلسل من بطولة صابرين، وصلاح عبد الله، وكريم عفيفي، وسهر الصايغ، وملك قورة، وولاء الشريف، وطارق عبد العزيز، وأحمد خالد صالح، وخالد عليش، وخالد كمال، ومحمد محمود، أحمد السيسي.

المسلسل من تأليف “أمين جمال” و”إبراهيم محسن” و”محمد فتحي عبد المقصود” و”شريف يسري”، إخراج “وائل إحسان”.

 

  • الواد سيد الشحات

والمسلسل ده هيجمع الفنان “أحمد فهمي” بـ”هنا الزاهد”، وهو عمل كوميدي، من بطولة أكرم حسني، وهشام قدري، ومحمد عبدالرحمن.

(الواد سيد الشحات) من تأليف “مصطفي صقر”، وإخراج “أحمد الجندي” وإنتاج (سينرجى – تامر مرسي).

 

  • طلقة حظ

هيشارك الفنان “مصطفى خاطر” السنة دي بمسلسل “طلقة حظ”  اللي بتدور أحداثه في إطار كوميدي، وبمشاركة مجموعة كبيرة من النجوم منهم محمد أنور، وخالد أنور، وآيتن عامر، وإنعام سالوسة، وأحمد ماهر.

المسلسل من إخراج “أحمد خالد أمين”، وتأليف “إيهاب فهمي”، وإنتاج (سينرجي – تامر مرسي) .

 

  • سوبر ميرو

المسلسل بيضم عدد من نجوم الكوميديا، منهم إيمي سمير غانم وحمدي المرغني، وميار الغيطي.

وبتدور أحداث المسلسل في قالب كوميدي حولين “إيمي” اللي هتقوم بدور بطلة خارقة شغاله صحفية في مجلة، وهتحصل لها مجموعة من المواقف والأزمات بأسلوب كوميدي.

(سوبر ميرو) من إنتاج (محمد السبكي).

 

  • حكايتي

مسلسل (حكايتي) هيكون أول تجربة للبطولة المطلقة للفنانة “ياسمين صبري” واللي هتدخل بيه في سباق الدراما السنة دي، مع النجمة وفاء عامر، وإدوارد، وأحمد صلاح حسني، وأحمد حاتم، وأحمد بدير، ومها أبو عوف، وإسلام جمال، وأحمد جمال سعيد، ودنيا المصرى، وجمال عبد الناصر ومصطفى درويش، وغيرهم من النجوم.

المسلسل من  تأليف “محمد عبد المعطي”، وإخراج “أحمد سمير فرج”.

 

  • كلبش 3

وده المسلسل اللي مجموعة كبيرة من المشاهدين مستنيينه من رمضان اللي فات، بعد نجاح الجزئين الأول والتاني، وطبعًا المسلسل من بطولة أمير كرارة مع مجموعة من النجوم، منهم أحمد عبد العزيز، وهشام سليم، ويسرا اللوزى، وأحمد العوضى، وإسلام جمال، محمد على رزق.

(كلبش 3) من تأليف “باهر دويدار” وإخراج “بيتر ميمى” وإنتاج شركة (سينرجى – تامر مرسي)

 

 

 

 

 

  • لآخر نفس

وده المسلسل اللي هترجع بيه الفنانة “ياسمين عبد العزيز” للدراما والتلفزيون بعد غياب طويل، وهيشاركها في بطولته مجموعة كبيرة من النجوم، منهم أحمد صلاح حسني، وفتحي عبد الوهاب، وأحمد العوضي، وثراء جبيل.

المسلسل هيكون من إنتاج شركة (سينرجى – تامر مرسي)  ومن تأليف “أمين جمال” و “طارق الكاشف”، وإخراج “حسام علي”.

 

  • اللعبة

مسلسل “اللعبة” واحد من ضمن المسلسلات المشاركة في سباق الدراما لرمضان 2019، واللي هيكون من بطولة هشام ماجد، وشيكو، ومي كساب، وسامي مغاوري، وبتدور أحداثه حولين شخصية مدير فندق اسمه “وسيم” هيتعرض بسبب اسمه ومنصبه لمغامرات كتير.

(اللعبة) تأليف “محمد صلاح خطاب”، إخراج “معتز التوني”.

 

  • زي الشمس

هتخوض الفنانة “دينا الشربيني” البطولة المطلقة لثاني مرة في مسلسل “زي الشمس” اللي هيتعرض في رمضان الجاي، وهو النسخة العربية من مسلسل إيطالي بيحكي عن أختين توأم، واحدة ماتت في جريمة قتل، والتانية هتدور على اللي قتلها.

بيشارك في بطولة المسلسل الفنانة ريهام عبدالغفور، وأحمد السعدني، وأحمد داوود، وأحمد مالك، وسوسن بدر.

 

  • مملكة إبليس

بعد طول انتظار، وكلام كتير، وتكهنات أكتر، أخيرًا أعلنت الفنانة رانيا يوسف عن دخولها المنافسة في مسلسلات رمضان 2019 من خلال مسلسلها الجديد “مملكة إبليس”، واللي هيشاركها في بطولته مجموعة كبيرة من النجوم منهم غادة عادل وأحمد داوود وإيمان العاصي وخالد أنور وكريم قاسم وسلوى خطاب.

المسلسل من تأليف “محمد أمين راضي” وإخراج “أحمد خالد موسى”، وإنتاج “طارق الجنايني”.

 

  • البرنسيسة بيسة

البرنسيسة بيسة هو اسم العمل اللي هتقدمه الفنانة مي عز الدين في رمضان السنة دي، واللي يعتبر ثانى تعاون درامى مع شركة “سينرجى” وهيشاركها فى بطولته الفنانة بوسى، ونجم مسرح مصر محمد أنور، وسامى مغاورى، وأمير المصرى، وحجاج عبد العظيم.

“البرنسيسة بيسة” من إخراج “أكرم فريد”.

 

  • من نظرة عين

“من نظرة عين” ده مسلسل الفنانة دنيا سمير غانم السنة دي، واللي لسه بتتصور مشاهده لإنه بينتمي لنوعية الحلقات المنفصلة، يعني أحداث كل حلقة ملهاش دعوة باللي قبلها.

 هيشارك دنيا سمير غانم في البطولة شيماء سيف، ومحمد سلام، وإسلام إبراهيم ومحمد أوتاكا.

المسلسل من إخراج “خالد الحلفاوي” وهو من إنتاج “هشام جمال”.

 

  • علامة استفهام

الفنان محمد رجب هيدخل السباق الرمضاني بمسلسله الجديد “علامة استفهام”، وهيشاركه في بطولته مجموعة كبيرة من النجوم منهم ميرهان حسين ومحمود البزاوي، وهيثم أحمد زكي ومي سليم.

“علامة استفهام” من تأليف “إسلام حافظ”  وإخراج “سميح النقاش”.

 

  • ياسمينا “ملكة الغجر”

هتدخل الفنانة حورية فرغلي رمضان السنة دي بمسلسل ياسمينا “ملكة الغجر”، اللي بيتناول حياة “الغجر”، وبيقدمهم بشكل جديد لأول مرة علي مستوى الحوار والصورة والملابس والديكور، وهو من تأليف الكاتب “محمد الغيطي” وإخراج “عبد العزيز حشاد”، وبيشارك في بطولة المسلسل عدد كبير من الفنانين منهم فيفي عبده، وسامح الصريطي، وأحمد كرارة، وسناء شافع، وحازم سمير، وميار الغيطي، وعزة مجاهد.

مقترح