The Definitive Guide to Living in the Capital , Cairo , Egypt

لو لفينا الأرض مش هنلاقي أعجب من الشعب المصري بتعقيداته وتفرده وميوله اللي ماحدش يقدر يحددها بوضوح أو يعرف اتجاهها بدقة. على سبيل المثال البرامج اللي بتتلقى أكبر قدر من الانتقادات والاتهامات والشتائم، هي نفسها البرامج اللي بتحقق أكبر نسب مشاهدة وإقبال سواء من خلال التليفزيون أو حتى من خلال المشاهدة عبر الإنترنت.

وده اللي بينطبق على برامج المقالب بشكل عام وعلى برنامج رامز جلال (رامز تحت الأرض) بشكل خاص.

فضيحة

كالعادة وقبل عرض البرنامج بوقت قصير بدأت مشاكل برنامج رامز جلال في الظهور. المرة دي لم تكن في رفض النجوم عرض حلقاتهم زي ما حصل في حلقة الفنانة آثار الحكيم قبل كده، لكن المرة دي لما فضح المذيع اللبناني (طوني خليفة) خدعة البرنامج قبل عرضه وأثناء تصويره، وقال أنه تلقى دعوة من مقدم البرامج (نيشان) لتصوير حلقة، لكنه اكتشف في النهاية أن الموضوع كله خدعة من خدع رامز جلال!

مستشفى الأمراض العقلية

مش كده وبس. مع بداية عرض البرنامج قدم المستشار مرتضى منصور طلب لإيداع رامز جلال مستشفى الأمراض العقلية، ووصف برامج رامز بأن كلها تعتبر محاولات شروع في قتل، وضرب مثال على حلقة مصطفى خاطر اللي فعلًا تعرض فيها لخطر كبير.

فبركة

من ناحية تانية اهتم كتير من رواد السوشيال ميديا كالعادة بتصيد الأخطاء في البرنامج علشان يثبتوا فبركة الأحداث زي ارتداء مصطفى خاطر لـ(مايك) وهو بيتعرض للمقلب وغيرها من الأخطاء اللي بتستعرضها المواقع دايمًا تحت مسمى ( بالفيديو والصور اثبات فبركة برنامج رامز جلال). وهي نفس الاتهامات اللي بتواجهها برامج المقالب كل سنة وخصوصًا برنامج رامز. وتقريبًا هيفضل سر فبركة البرنامج من عدمه زي سر انتحار سعاد حسني أو مقتلها!

تحت الأرض

نتكلم شوية عن البرنامج نفسه بقى. البرنامج بيبدأ بتتر سريع بكلمات جذابة وموسيقى سريعة جدًا بتظهر رامز وهو بيهاجم أشخاص كتير وبيرد على منافسيه ومنتقديه. ثم بتبدأ الحلقة بتقديم سريع من رامز للبطل. لا يخلو من الاستهزاء والسخرية منه.

ثم بنبدأ نشوف مراحل دخول الضيف للصحراء اللي هيتم فيها تصوير برنامج (نيشان) المزيف ومن ثم بيتعرض الضيف لمقلبين. الأول خفيف وسريع أثناء ركوب الجمل، والثاني وهو المقلب الرئيسي أثناء ركوب سيارة للانتقال من مكان للتاني.

بتتوقف السيارة بعد جولة مرعبة وبيتم إيهام الضيف أنه بيغرق في بحر من الرمال المتحركة.

العيب الأساسي في البرنامج هو التكرار من المواسم السابقة اللي قدمها رامز. يعني مافيش أي تغيير في طريقة التقديم أو العرض. كل موسم هو نسخة من الموسم السابق مع اختلاف المقلب طبعًا. كمان الطريقة المهينة اللي بيتكلم بيها رامز عن النجوم وانتقاده لطريقة كلامهم ولبسهم بتكون في أحيان كتيرة خارجه عن اللياقة.

ردود الأفعال

 

 

طبعًا ردود أفعال الفنانين على الحلقات كانت مختلفة، فيفي عبده اللي كانت ضيفة الحلقة لأولى دخلت في وصلة من الشتايم اللي جعلت أخر فقرة في البرنامج عبارة عن سلسلة لا تتوقف من صوت (تيت) المستمر. وحتى الصوت لم يمنع المشاهدين من استنتاج كتير من الشتايم من خلال حركة الشفايف.

أما مصطفى خاطر فكانت حلقته أهدى شوية وماقالش أي ألفاظ وده جعل مستخدمي السوشيال ميديا يوصفوه بأنه شخص خلوق ومحترم.

كمان الشاب خالد كان حاسس بصدمة كبيرة، ونادية الجندي واللي كانت ضيفة الحلقة الخامسة قررت عدم إذاعة الحلقة لكن بعد تفكير قررت الموافقة وأعلنت موقفها من خلال صفحاتها على السوشيال ميديا.

الحلقات القادمة

وبنتوقع في الحلقات القادمة ظهور نجوم أقوى وأثقل زي محمود حميدة واللي أثار ظهوره بالبوكسر في إعلان البرنامج ردود أفعال تتراوح بين الغضب والدهشة، وكمان بننتظر ظهور النجم العالمي شاروخان، ونيللي كريم وغيرهم من النجوم اللي بينتظر محبي رامز جلال ظهورهم معاه علشان يشوفوهم بشكل مختلف عن ظهورهم التقليدي في الأفلام والمسلسلات.