The Definitive Guide to Living in the Capital , Cairo , Egypt

“السجن مش سور عالي وباب مقفول عليك.. السجن ممكن يكون في هدمة مش عاوز تلبسها… ناس مش عاوز تشوفها.. شغلانة مش حاببها… السجن كسرة وقهرة نفس.. وأنا نفسي أكون حرة”.

كلمات بسيطة بـ تحمل فى داخلها معاني أكبر بكثير، هو ده باختصار مسلسل “سجن النسا” اللى ألفته فتحية العسال (رحمها الله) وكتبت حواره مريم نعوم وأخرجته كاملة أبو ذكرى وقامت ببطولته نيللى كريم… الحقيقة أن “نيلى، مريم، كاملة” من الثلاثيات النسائية القوية جدًا فى عالم الدراما، التعاون الأول بينهم كان من خلال مسلسل “ذات” اللى حقق نجاح كبير رمضان الماضى، وواضح أن النجاح مستمر للعام الثانى على التوالى.

الحقيقة أننا بـ نخاف من الثنائيات أو الثلاثيات النسائية فيما يتعلق بالتمثيل والإخراج والسيناريو، بـ نخاف من التركيز على قضايا المرأة بشكل عام والمشاكل اللى -رغم أهميتها- مش بـ تشغل حيز كبير من تفكير القطاع الكبير من الشعب، لكن ثلاثي نيللى ومريم وكاملة قدر أنه يخرج بره التصنيف النوعي ويتجه لمشاكل المجتمع بشكل عام، ولما بـ يتناول المرأة ومشاكلها بـ يتناولها بذكاء وتنوع.

المشاهد الافتتاحية للمسلسل بـ تورينا إزاى غالية (نيللى كريم) بـ تضطر بسبب ضغط الظروف المادية والاجتماعية أنها تلتحق للعمل فى وزارة الداخلية كسجانة فى سجن النساء، بعد وفاة والدتها اللى كانت بـ تشتغل نفس الشغلانة، الأمر اللى أعطاها بعض الأفضلية و(الواسطة) للالتحاق بالوظيفة.

على الرغم من اسم المسلسل إلا أن السجن وحياته مش هى الشىء الوحيد اللى بـ يركز عليه المسلسل، المسلسل رحلة فى المجتمع بكافه طوائفه، وتجسيد متميز لأنماط مختلفة من البشر فى زمن صعب وبيئة اجتماعية ومادية فى غاية الصعوبة.

من الممثلات اللى قاموا بدور ممتاز فى المسلسل ريهام حجاج.. منذ اشتهارها فى مسلسل “رقم مجهول” وإحنا عندنا إيمان قوى بموهبة ريهام وقدرتها على تنمية أدواتها كممثلة شابة بـ تسعى بقوة ناحية تقوية أدائها، نفس الطريق اللى مشيت عليه نيللى كريم قبل كده، وقدرت تزود من قدراتها فى الأداء لحد لما وصلت لذروتها فى “ذات” ومن بعده “سجن النسا”.

على صعيد الديكور والموسيقى… الموسيقى كان ممكن تكون أحسن، لكن الديكور كان متناسق مع الأحداث بشكل كبير، والتصوير فى سجن النساء كان له دور كبير فى معايشتنا للواقع بحقيقته كاملة، وإن ضاع جزء كبير من الحلقة الثانية مثلاً فى الحكي عن السجن بأسلوب تقريري يلائم برامج ريهام سعيد أكثر ما يلائم مسلسل درامي تليفزيونى.

“سجن النسا” واحدة من أفضل المسلسلات في رمضان 2014 وفريق الكتابة والتمثيل للمسلسل هـ يكون له شأن كبير في المستقبل القريب.

علشان تعرف مواعيد وقنوات عرض “سجن النسا” زور “دليل كايرو 360 للتليفزيون فى رمضان“.