The Definitive Guide to Living in the Capital , Cairo , Egypt

تليفزيون
شوك توك

شوك توك: رحلة كفاح علىmbc مصر

  • ميس حمدان – ياسر طوبجي – إيمان سيد – بدريه طلبة – كريمة عبد الله
  • كوميدي
  • من الآن
  • سيف ممتازسيف ممتاز
تم التقييم بواسطة
Rasha Zeidan
قيم
قيم الآن
شوك توك: رحلة كفاح علىmbc مصر

الرحلة هي أول حاجة تيجي في عقلنا وإحنا بـ نتكلم عن البرنامج اللى معانا النهارده، مش الرحلة بس، لكن كمان الصبر والعمل والشغل الجاد والاهتمام بكل اللى بـ تعمله علشان توصل للى أنت عاوزه، دي قصة حياة مجموعة من الممثلين اشتغلوا سنين على قنوات التليفزيون المصري في رحلة طويلة بـ يعملوا أسكتشات كوميدية وبرامج ضحك لحد ما وصلوا لتشكيلة كده من ضمنها "ربع مشكل".. حاجة بـ تتريق على خلق الله لكنها بـ تهدف في النهاية للضحكة والمضمون الجيد.

وعلشان هما كانوا صابرين وبـ يهتموا بشغلهم وعاوزين يطلعوه على أتم وجه، بقوا مشهورين واشتغلوا في موجة كوميدي، ومن بعدها انتشروا أكثر وعملوا برنامج جديد فيmbc  مصر اسمه "شوك توك"، مش توك شو يعني، والجواب بـ يبان من عنوانه، هما ناويين يشقلبوا كل حاجة يعني يعملوا كل حاجة وعكسها، البرنامج بـ يسخر من كل برامج التوك شو في مصر، هـ تشوف فيه برنامج "صبايا الخير، العاشرة مساءً، ممكن، لازم نفهم، آخر النهار.. إلخ، كل ده هم بـ يقدموه بطريقتهم الساخرة سواء من ناحية اسم البرنامج أو مضمونه.

الحقيقة البرنامج زيه زي أي برنامج ثاني فيه حلقات هـ تموتك من الضحك وحلقات ثانية عادية جدًا.. وهو بـ يتعرض بشكل يومي يعني فيه ضحك كل يوم، لو أنت عاوز، المهم أنك ما تتضايقش من الحلقات العادية وتقول ده برنامج عادي.

صراحة واللى لازم نعترف به البرنامج فيه مجهود عالي جدًا سواء في طريقة كتابته، يعني فيه سيناريو، وهما أكيد بـ يتفرجوا على الحلقات المختلفة لكل برنامج بـ يتريقوا عليه، وكمان بـ يدرسوا شخصية مقدم البرنامج، وصراحة برضه اختيارهم للشخصية اللى بـ تمثل شخصية مقدم البرنامج بـ يبقى هائل لأنها بـ تبقى قريبة قوي من الحقيقة، وده بـ يعطي للبرنامج حالة مختلفة وهائلة لو اتوفقوا في سيناريو حلو وفكرة جيدة وأسكريبت يضحك هـ تبقى حلقة جامدة.

كمان لازم نقول أن مسئول الماكياج الخاص بالبرنامج من حلقاته الأولى وهو قادر يعمل جو مختلف والشخصيات كمان فيها جزء كده من حكايات "سندريلا، شخصيات شعبية جدًا، أو تقليد لمذيعين"، والكوكتيل اللى فات ده هو اللى بـ يعمل لنا برنامج مختلف عاوز يقدم حاجة ساخرة لأبرز البرامج السياسية والاجتماعية والفنية، وبـ يقدم صناع البرنامج مجموعة شخصيات شبه ثابتة من خلال الأسكتش الكوميدي اللى بـ يتفاعل معها المشاهد في إطار حلقات متصلة منفصلة.

عجبك ؟ جرب

برنامج شوك توك من تقديم ميس حمدان، ياسر طوبجي، إيمان سيد، بدريه طلبة، كريمة عبد الله.. ويعرض يوميًا الساعة 8:30 مساءً على قناة mbc مصر.

نصيحة 360

برنامج "ميكروفون" على قناة mbc مصر.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح