The Definitive Guide to Living in the Capital , Cairo , Egypt

الإعلانات التجارية أصبحت علامة مميزة من علامات شهر رمضان زيها زي الفانوس والمسلسلات وبرامج المقالب، والسنة دي الشركات كانت بتتنافس بشكل حقيقي علشان تكسب إعجاب واهتمام الجمهور المصري.

في السطور الجاية هنكلمكم عن أكتر الإعلانات اللي كانت متميزة من وجهة نظرنا.

إعلانات شركات الاتصالات

كان السباق بينهم شديد جدًا خاصًة أن كل شركة أستعانت بنجوم معروفين ولهم شعبية عند كتير من فئات المجتمع المصري بكل أعماره، وبالنسبة لنا شركة فودافون كانت الأكثر إبهارًا السنة دي في تقديم إعلاناتها سواء من حيث شعبية وعدد النجوم اللي استعانت بهم، أو من حيث الفكرة المختلفة.

فودافون استعانت بالمطربة شيرين عبد الوهاب والمطرب تامر حسني لأداء أغنية الإعلان مع كل من غادة عادل و رمضان صبحي ومدرب المنتخب المصري هيكتور كوبر والثنائي كندة علوش وعمرو يوسف، والإعلان كان أقرب لكليب غنائي بيوضح جمال رمضان في مصر.

كلمات الأغنية كانت مميزة واللحن كان سهل يلزق في الدماغ وتلاقي نفسك بتردده غصب عنك. كمان التصوير كان مبهر.

 

 

أما شركة موبينيل فتعاقدت مع الممثل الكوميدي محمد هنيدي، وكان الإعلان دمه خفيف جدًا، ودي حاجة بنتوقعها دايمًا من أي ظهور لهنيدي.

أغنية الأعلان كانت مزيج من أغاني قديمة وشعبية معروفة عند كل المجتمع المصري. والتصوير كان متميز والأعلان خرج أقرب لكليب أغنية كوميدية من أنه يكون أعلان دعائي.

 

 

أما شركة اتصالات فبعد نجاح أغنية “تخيل بكرة” اللي غنتها أصالة السنة اللي فاتت، استعانت الشركة بأصالة تاني السنة دي مع المطرب محمد حماقي.

الكليب كالعادة مبهج وبيركز علي الإصرار وحب الحياة وتحدي كل العقبات اللي ممكن تقابل أي أنسان في طريقه.

وتم اختصار الدعاية للشركة في صوت طارق نور في نهاية الإعلان وهو بيفكرنا بمرور 10 سنين علي وجود شركة اتصالات في مصر.

 

 

إعلان حديد المصريين

واللي من أحلي الأعلانات الدعائية اللي ممكن تتعمل لمصر واللي تم الاستعانة فيه بلاعب كرة القدم العالمي كرستيانو رونالدو واللي بيعرض أجمل الأماكن في مصر.

الإعلان دعائي لمصر أكتر من أنه يكون دعائي للمنتج نفسه، ودي فكرة ذكية من صناع الإعلان، وعلشان كده الإعلان أبهج كل المصريين خاصة بعد ما تم ترجمته للغة الأنجليزية.

 

 

إعلانات التبرعات

ودي الأعلانات الخاصة بعمل الخير وجمع التبرعات للمؤسسات الخيرية والمستشفيات وللأسف كانوا بيصروا السنين اللي فاتت أنهم يوجعوا قلوب كل المشاهدين لدفعهم للتبرع، أما السنة دي فالإعلانات كانت مبهجة أكثر منها حزينة.

زي إعلان مؤسسة مجدي يعقوب اللي بتظهر فيه بنت جميلة بتشكر المصريين على التبرع للمؤسسة، وإعلان مؤسسة الزكاة المصري واللي استعان بفنانين زي دلال عبد العزيز وعمرو سعد.

أما جمعية رسالة فقدمت لنا المطرب مصطفي قمر، نيكول سابا، والشيف حسن وده كله في جو مبهج ولطيف من غير أي دموع أو استفزاز لأي مشاعر.

وطبعًا إعلان مستشفي 500 500 واللي قام بطولته الطفل زين يوسف اللي كان طاقة نور وأمل لكل اللي عرفوا قصته.

 

 

إعلانات العقارات والقرى السياحية

إعلان”موسي كوست” وده بقي مزيج هايل بين نجوم الثمانينيات زي حميد الشاعري وهشام عباس ومني عبد الغني، في مقابل فرقة أندر جراوند مشهورة جدًا بين الشباب دلوقتي وهي “شارموفرز”.

تصوير الإعلان مبهج جدًا والأغنية رائعة خاصة أنها مكس بين أغاني قديمة وأغاني جديدة معروفة.

 

 

كنده علوش وعمرو يوسف مستمرين في استغلال حصولهم علي لقب أجمل ثنائي في 2017 فقاموا ببطولة أعلان كومباوند نيوبلس وادى دجلة وفعلًا الإعلان ممتع لكل المشاهدين اللي بيحبوا طلة كندة وعمرو مع بعض كزوجين جداد.

 

 

إالعلانات الأدوات المنزلية

إعلان شركة “يونيفرسال” حقق نجاح كبير بسبب أن الشركة استعانت بالنجمة ليلي علوي واللي قامت بعمل مشهد كوميدي  غنائي دعائي لمنتج يونيفرسال وكان ناجح جدًا. وواضح أن ليلى علوي حبت الإعلانات بعد تجربتها السنة اللي فاتت مع فودافون.