The Definitive Guide to Living in the Capital , Cairo , Egypt

في رمضان الماضي قدمت دنيا وإيمي سمير غانم، بالتعاون مع والدهم سمير غانم، مسلسل نيللي وشريهان. المسلسل حقق نجاح كبير، وكان واحد من أكثر مسلسلات رمضان مشاهدة. وتقريبًا أفضل مسلسل كوميدي في رمضان اللي فات.

ولأن قطاع كبير من العالم الفني في مصر ماشي بالمثل الشعبي اللي بيقول: “اللي تغلبه به العب به”، النهارده فريق عمل المسلسل بيكرر تقريبًا نفس التجربة بنفس العناصر. لكن الغريب أن النجاح المرة دي لم يكن حليف المسلسل. ياترى إيه الأسباب؟ ده اللي هنتعرض له من خلال موضوعنا عن مسلسل في اللالا لاند.

قصة المسلسل

المسلسل بيحكي عن مضيفة طيران بتستلم عملها لأول مرة على إحدى الطائرات. ومن خلال أول دقائق في أول حلقة، بنستعرض مع بعض العديد من أنماط الشخصيات، من خلال الناس الموجودة على متن الطيارة. لكن في النهاية بتقع الطائرة في أحد الجزر. وبيلاقي المسافرين نفسهم وجهًا لوجه مع ظروف صعبة. الأمر اللي بينشأ عنه في النهاية مجموعة لا تنتهي من المواقف الكوميدية.

فريق العمل

فريق عمل المسلسل هو نفسه فريق عمل مسلسل نيللي وشريهان، بتاع رمضان الموسم الماضي، بالإضافة لنجوم مسرح مصر. البطولة لدنيا سمير غانم ووالدها سمير غانم، وهنا زاهد وشيماء سيف ومحمد سلام. أما التأليف كان لمصطفى صقر عن فكرة هشام جمال. والإخراج لأحمد الجندي.

الأداء التمثيلي

دنيا سمير غانم بتمثل عملاً بمبدأ إنها تدي للجمهور الحاجة اللي بيضحك عليها كل مرة وخلاص. علشان كده اختارت انها تتكلم بلهجة فلاحي مضحكة، زي لهجتها في مسلسل الكبير. وأسلوب الكوميديا باللهجة أتبعته دنيا في معظم أعمالها، زي فيلم طير أنت على سبيل المثال. وزي بداية دورها في فيلم “لا تراجع ولا استسلام (القبضة الدامية)” لما كانت بتتكلم باللهجة اللبنانية.

دنيا اعتمدت على ده وماقدمتش أي جديد على مستوى الكوميديا أو حتى الأداء التمثيلي، ونفس الحالة من الاستسهال حسينا بها مع باقي نجوم العمل. واللي معظمهم اعتمد على تقديم أنماط ثابتة ومتكررة من الشخصيات. ممكن نقول أن السيناريو ظلم العمل لكن برضه الأداء التمثيلي من الجميع كان المفروض يكون أقوى وأحسن وأقل استسهالًا.

السيناريو والحوار والإخراج

سيناريو المسلسل ماقدمش جديد عن فكرة وقوع مجموعة مختلفة من البشر في مكان مهجور. بل على العكس ماقدرش يستغل كل الأمور الكوميدية اللي ممكن تخرج من موقف زي ده، وبدأ يسرد في تذكر كل واحد من الأبطال لماضيه قبل الحادثة، كنوع من أنواع تضييع الوقت. أما الحوار فكان عبء الكوميديا كله ملقى عليه. لكن الحوار مهما كان قوي مش هيقدر يتسبب في كل قدر الكوميديا اللي كنا نتوقعه من عمل زي ده.

طبعًا لازم نلوم الإخراج على عدم قدرته جمع العناصر دي كلها، علشان يقدم عمل قوي في النهاية. لكن على الأقل ماشوفناش أخطاء أو مشاكل، زي اللي شوفناها في مسلسلات تانية، حسينا فيها بالاستعجال الشديد من الإخراج، علشان يلحق العرض في موسم رمضان.

الديكور والموسيقى والأزياء

في رأينا نقطة تفوق المسلسل كانت في الديكورات المميزة، والتصوير على الجزيرة. وفى نفس الوقت تقديم مشاهد كتير مثيرة للعين مستقاه من المناظر الطبيعية على الجزيرة. كمان الموسيقى التصويرية كانت قوية، وألحان تتر البداية كانت رائعة. وعمومًا أغاني المسلسل كمان كانت جيده جدًا وحماسية.

أما الأزياء فكانت مناسبة لأحداث المسلسل، والظرف القاسي اللي بيتعرض له أبطاله. وبشكل عام ثلاثية الديكورات والموسيقى والأزياء كانت من الأمور المحسوبة للمسلسل.

الخلاصة

في اللالا لاند كان ممكن يكون أفضل مسلسل كوميدي في رمضان. لو بس فكر صناعه خارج الصندوق، وحاولوا يقدموا لنا كوميديا مختلفة عن كوميديا السنة الماضية.