The Definitive Guide to Living in the Capital , Cairo , Egypt

الأحداث بتدور في فترة زمنية قديمة، وبطل المسلسل الطبيب سعد (يوسف الشريف) اللي بيوصل الكفر ويشوف أحواله العجيبة، من فساد وفقر، واللعنات المسيطرة على سكانه، والخوف من شيخ الغفر (هادي الجيار)، وفي وسط كل ده بتحصل جريمة قتل لبنت اسمها (ريحانة) بيتم اتهام سعد فيها، لكنه بيخرج منها بسرعة، وبيبدأ عملية بحث عن المجرمين الحقيقيين ومن خلال الأحداث، وهنشوف أهل الكفر والعلاقات بينهم، وهتظهر الخطوط الفرعية للدراما.

الناس بتستنى مسلسل يوسف الشريف كل سنة، علشان يشوفوا الفكرة الجديدة، وأجواء الغموض والإثارة اللي بتجبر المشاهد إنه يتابع كل الحلقات بشغف وترقب، وكلنا كمشاهدين بنبقى مستنيين الـTwist  أو الخدعة اللي أكيد هتحصل في مسار الأحداث قبل النهاية.

 

 

نجح يوسف الشريف إنه يتعامل مع فريق عمل جيد علشان ينفذ فكرته في أفضل شكل ممكن. الكاتب الموهوب عمرو سمير عاطف قدر يعمل شبكة علاقات متشعبة جدًا بين أهل الكفر، بخيوط طول الوقت واضحة ومتماسكة، المخرج أحمد نادر جلال قدّم صورة مختلفة، واهتم بكل تفاصيل الديكورات والملابس، وتقطيعات المونتاج اللي كان ليها تأثير كبير على فهم الأحداث وتسلسلها.

وبفضل المخرج والسيناريست تفادى كفر دلهاب العيب المزمن لكل المسلسلات، وتقريبًا اختفى الحشو والمطّ، وعلى العكس كمان بقى في جرعة تشويق وإثارة كبيرة جدًا، تعتبر سبب أساسي في نجاح العمل.

وعن الأداء التمثيلي للأبطال، فمن الطبيعي إننا نبدأ بهادي الجيار في دور شيخ الغفر اللي يعتبر من وجهة نظرنا أهم حاجة قدمها في مسيرته لحد دلوقتي. وبحكم الموهبة والخبرة، قدم هادي الجيار شخصية شيخ الغفر القوية المتسلطة بهدوء وبأداء مُحكم، من غير صوت عالي أو حركات جسدية مبالغ فيها.

محمود حجازي في دور (طلبة) صديق الطبيب أداءه مختلف ولافت للأنظار، وغالبًا طريقة الكلام دي أضافها محمود حجازي للشخصية علشان يأكد براعته. صديق البطل التاني محمد خميس اللي قام بدور (عجبة حرامي القبور) في دور كبير يليق بحجم موهبته، وقدر يقدم أداء رائع وقوي.

 

 

أما عن يوسف الشريف -واللي بيزيد الجدل حواليه بعد النجاح الكبير لأعماله كل سنة- أداءه تطور إلى حد ما، لكن لسه قدامه شوية وقت وتجارب أكثر علشان يوصل للمشاهد كل المشاعر والانفعالات اللي بتمر بيها الشخصية، وأداءه لحد دلوقتي عملي وعادي، يخدم الغرض لكنه خالي من مهارات التجسيد.

وعامة شخصية سعد الطبيب مزيج من شيرلوك هولمز وطارد الأرواح الشريرة، وكمان هو رمز للعلم والعدل في وسط أهل البلد الغرقانين في الخرافات والظلم.

 

 

في النهاية نقدر نقول أن تجربة “كفر دلهاب” كانت تجربة موفقة، ولو فاتك تتفرج على المسلسل في رمضان تقدر تشوفه على يوتيوب وماتنساش تبقى تقول لنا رأيك.

ملحوظة لهواة التصنيف: المسلسل ممكن تصنيفه غموض وإثارة إنما مش رعب خالص