The Definitive Guide to Living in the Capital , Cairo , Egypt

انتقادات واسعة كانت بتوجه لعملاق الإنتاج السينمائي (مارفل)، أن ماعندهاش تنوع في الأبطال الخارقين اللي بتقدمهم في أعمالها. وكأن البطل الخارق لازم يكون، رجل، أبيض، أمريكي الجنسية والثقافة.

من فترة بدات مارفل في تغيير سياستها، وده كان واضح مع تقديم شخصية Black Panther  اللي قام بأداء الشخصية فيه الممثل الأسمر الشهير شادويك بوسيمان. لكن واضح أن مارفل في المسلسل القصير Ms. Marvel قررت تقدم لنا بطل خارق، يتحدى كل المعايير القديمة. ويضع بنفسه معايير جديدة تمامًا.

في البداية كان لازم نقول (تضع) معايير جديدة. لأن بطلة Ms. Marvel – زي ما هو واضح من الاسم- هي بنت، وباكستانية مش أمريكية، و -استعدوا للمفاجأة- مُسلمة. وطبعًا مش بيضاء البشرة.

مارفل مش مكسوفة من التعبير عن تغييرها القواعد بوضوح وصراحة، حتى أن كاميلا خان بطلة المسلسل بتقول في واحد من المشاهد لصديقها: انا عمري ما شوفت سوبر هيرو مش أبيض البشرة، أو من أصول غير أمريكية.

وكأن التجديد في قواعد السوبر هيرو في Ms. Marvel كان أكتر من كافي لمارفل، بنشوف القصة التقليدية لكل سوبر هيرو تاني. كاميلا خان (قامت بالدور الكندية من أصل باكستاني إيمان فيلاني) هي بنت مسلمة أمريكية من أصول باكستانية، عايزة يكون لها طريقها واختياراتها الشخصية في الحياة، بينما أهلها بيصادروا عليها أبسط حقوقها في حضور حفلة تنكرية، بسبب أنهم أسرة محافظة. لكنها بتحصل بطريقة ما على أداة بتعطيها طاقة خارقة، وبتبدأ تتطور الأحداث علشان نشوف الطريقة اللي هتستغل بيها الطاقة دي.

إخراج Ms. Marvel كان واحد من أهم عوامل تميزه. كل البيئة اللي بتدور فيها الأحداث بتساعدنا على الوصول لعقل ودماغ الشخصيات. زي إننا نشوف الجمل الحوارية بين الأبطال لما بيبعتوا لبعض رسايل، وهي مكتوبة على أرضية الشوارع بدل كتابتها بطريقتها التقليدية في بالونات فوق رأس الشخصيات زي ما بنشوف دايمًا.

كمان عجبنا طريقة المزج بين خيال الأبطال وبين المشاهد على الشاشة، علشان نشوف تميز بصري مش بنشوفه بقى لنا فترة في مختلف الأعمال الدرامية. ويمكن هنلاحظ اختلاف في بعض العادات الإسلامية اللي بيعرضها المسلسل عن حياة المسلمين في المنطقة العربية، لكن ما تنسوش أننا بنشوف المرة دي الإسلام بعيون باكستانية مش عربية. ودي فرصة جديدة علشان نتعرف على جوانب مختلفة لحياة ناس من أصول/ أديان مختلفة عن الدولة اللي عايشين فيها.

تفاصيل قد تبدو صغيرة، لكن محبي عالم مارفل السينمائي، ومهاوويس عوالم السوبر هيروز، هيشوفوا في Ms. Marvel عمل شيق جدًا، خاصة في تترات البداية والنهاية، مع المشهد المهم اللي بنشوفه بعد نهاية عرض الأسماء على الشاشة، وهي عادة عودنا عليها مارفل، وبيكون فيه تلميح لأحداث قادمة في باقي الحلقات. كل دي حاجات خلتنا مستنيين الحلقات القادمة من Ms. Marvel على أحر من الجمر. علشان نشوف بطلة مارفل الجديدة اللي كسرت كل قواعدها القديمة.. هتنجح في امتاعنا ولا هتفشل؟!