The Definitive Guide to Living in the Capital , Cairo , Egypt

في كل مجال من مجالات العمل بـ تكون
فيه شخصيات لامعة ولها دور قوي في عملها لكننا مش بـ نعرف عنهم إلا القليل سواء
كان في المجال الفني أو العلمي وغيرها، لكن برنامج مشاهير اللى بـ يعرض على قناة
دبي الفضائية قدر يسهل علينا المهمة دي لأنه بـ يهتم بكل المشاهير البارزين في كل
المجالات، ومش بـ يهتم بالفنانين فقط لكن كمان بمجالات الطبخ، والفنون التشكيلية، والموضة،
وصناعة المجوهرات وغيرها من مجالات ثانية كثير.

والجميل في البرنامج أنه بـ يقدم
ملخص بسيط زي عناوين الأخبار الخاصة بمضمون الحلقة وكمان بـ يكون فيها أخبار عن
الفنانين والمهرجانات العالمية وعروض الأزياء وبعد كده فيه لقاءات حوارية خارجية
مع بعض المشاهير البارزين في المجالات المختلفة وكمان بـ يهتم البرنامج بالشخصيات
الناجحة عالميًا مش على مستوى العالم العربي فقط.

يعني مثلاً فيه لقاء حواري مع
صانعة عطور عالمية وعن آخر صيحات الموضة في المجال ده وكمان بـ يهتم البرنامج
بعروض الأزياء بشكل مختلف زي مثلاً عرض للشنط الحريمي وكمان بـ يعرض كل ما هو جديد
في مجالات المشهورين عالميًا، وبالتالي يقدر المشاهد أنه يستفيد من أحدث الحاجات
قبل نزولها للأسواق زي مثلاً عروض الأزياء أو المجوهرات أو العطور أو أكلات جديدة
ومبتكرة وغيرها، ويعتبر كمان أنه سبق جيد للبرنامج، ودائمًا بـ يسلط الضوء على
المجالات عالية الرفاهية زي عروض سباق الخيل والجمال، وكمان بـ يكون فيه لقاءات
حوارية مع فنانين حضروا المهرجانات أو العروض لكن المختلف فيه أن محور الكلام بـ يكون
كله عن المعرض أو الحدث نفسه مش عن الفنان أو أعماله وده يعتبر دعاية غير مباشرة
للأماكن اللى بـ يحصل فيها المعرض أو المهرجان، وده طبعًا يخلى المشاهد يعرف أن
البرنامج لا يهتم بالأشخاص لكن بالأماكن كمان.

ونلاحظ أن أداء مذيعة البرنامج
عادي جدًا مافيهوش تميز، لكن جمال البرنامج وتميزه بـ يكون في المضمون اللي بـ يقدمه،
وكمان بـ تهتم المذيعة بين فقرة وثانية بالتنويه عن صفحة الفيس بوك والكواليس
الخاصة بالبرنامج، ورغم جمال البرنامج إلا أنه بـ يهتم بالمجالات الفنية وخطوط
الموضة وغيرها، لكن مش بـ يهتم بالمجالات الثانية زي العلمية أو الثقافية لكن أغلب
تركيزه على مجالات الرفاهية.

 وبالتالي ده بـ يعكس عدم اهتمامه بالجمهور
العادي، وده بـ يخلي البرنامج مش بـ يقدر يوصل لكل أنواع الجمهور في مختلف المجتمعات
العربية خاصة مع الأحداث اللى بـ تمر بها أغلب الدول، وكمان بـ تهتم في أغلب
لقاءاته بالحوارات الخارجية ومافيش أي اتصال بالستوديو إلا من خلال تقديم فقرات
البرنامج، كمان الديكور عادي جدًا وغير متناسب مع طبيعته اللي بـ تهتم بالموضوعات
الثرية والمميزة وكمان مستوى التصوير الخارجي رديء، فالصورة غير واضحة في بعض
اللقطات رغم أن إنتاج البرنامج تابع لمؤسسة دبي للإعلام.