The Definitive Guide to Living in the Capital , Cairo , Egypt

العيد السنة دي مختلف عن أي عيد، لإنه أول عيد هنكون مجبرين فيه كلنا على القعدة في البيت علشان نحمي نفسنا من فيروس كورونا المستجد.. لكن مع مجموعة الأفلام اللي هنقول لكم عليها في السطور الجاية مش هتحسوا بأي ملل.. يلا نبدأ.

لو أنت من عشاق الأكشن والإثارة، يبقى ماينفعش يفوتك:

John Wick

الفيلم بيدور عن القاتل المحترف جون ويك (كيانو ريفز)، اللي عايش بعيد عن عالم الجريمة. لكن بيضطر يرجع لها تاني، بعد ما قام ابن رئيس عصابة كبيرة بسرقة السيارة بتاعته، وكمان قتل كلب صغير كان هدية من مراته قبل ما تموت. جرعة أكشن مكثفة، هتعيشك في أجواء مختلفة تمامًا. تقييم الفيلم 7.3. وتقدر تتفرج على الجزء التاني منه كمان.

 

أما لو بتحب الكوميديا والضحك، يبقى لازم تشوف:

Ride Along

“كيفين هارت” واحد من النجوم اللي تقدر تخليك تضحك مهما كنت متضايق. في الفيلم ده بيحب واحدة أخوها ظابط بوليس، وعايز يتجوزها. وعشان أخوها يوافق عليه، لازم يثبت شجاعته من خلال عمله كظابط بوليس لمدة يوم كامل. تقييم الفيلم 6.2. الفيلم له كمان جزء تاني.

 

أفلام السيرة الذاتية، والمأخوذة عن قصة حقيقة، لها طابع خاص. وفي النوع ده بنرشح لك:

Lion

النجم “ديف باتل” أبدع في دور (سارو). طفل هندي عنده 5 سنين بيتوه من أسرته. بتمر الأيام وبتتبناه عائلة استرالية. وبعد 25 سنة، بيقر يدور على عائلته الأصلية في الهند. الفيلم اترشح لـ 6 جوائز أوسكار. وتقييمه 8.1.

 

عايز بقى حاجة دراما، وبتتكلم عن قصة نجاح مع طابع رومانسي خفيف، يبقى هتلاقي ده في:

The Hundred-Foot Journey

من بطولة “مانيش دايال” و”هيلين ميرين”، بتدور أحداث الفيلم عن عائلة هندية بتروح قرية في فرنسا، وتفتح مطعم قدام أشهر مطعم في القرية دي. وبتحصل بعدها مجموعة من الأحداث الطريفة، بين العائلة وصاحبة المطعم. الفيلم تقييمه 7.3.

 

أفلام الموسيقى والاستعراض بتشد أي حد، حتى اللي مش غاوي أفلام موسيقية. وده اللي قدر يحققه فيلم:

La La Land

عازف الجاز الطموح “رايان جوزلينج”، بيقع في حب “إيما ستون” اللي بتعشق التمثيل. وبتدور الأحداث عن محاولة كل واحد تحقيق حلمه. مع شوية استعراضات غنائية، مختلفة ومتنوعة خلال الأحداث. الفيلم تقييمه 8.2، وفاز بـ 6 جوائز أوسكار.

 

أجواء المغامرة مع الخيال، بتاخدك لعالم تاني مختلف. ده هتلاقيه في:

Miss Peregrine’s Home for Peculiar Children

الفيلم من بطولة النجمة “إيفا جرين”، وإخراج “تيم برتون”. بتدور أحداثه عن بيت السيدة “بيريجرين”، اللي بيعيش فيه كل الأطفال اللي عندهم قدرات خارقة. وبيستعدوا للوقت اللي هيواجهوا فيه خطر كبير. تقييم الفيلم 6.7.

عيد سعيد.