The Definitive Guide to Living in the Capital , Cairo , Egypt

من اللحظة الأولى اللي عرفنا فيها بعرض مسلسل (موضوع عائلي) على منصة شاهد بشكل حصري، أضفناه لقائمة المشاهدة على طول. وبمجرد عرض الحلقة الأولى، عرفنا أن رهاننا كان على الحصان الكسبان. وبعد أيام معدودة أصبح (موضوع عائلي) هو الترند رقم ١ على شاهد في مصر، وبدأ إعجاب الناس بالمسلسل يظهر على السوشيال ميديا.

 

(موضوع عائلي) بيحكي عن الشيف إبراهيم (ماجد الكدواني)، اللي بيعيش حياة نمطية وحيدة بعد وفاة زوجته، بتقوم بدورها أمينه خليل، ثم بتنقلب حياته رأسًا على عقب لما بيكتشف أن له بنت وحيدة، بتقوم بدورها رنا رئيس، وأنه هيكون الوصي عليها علشان أصبح معاها ثروة ضخمة. لكن في نفس الوقت ماينفعش يعرفها أنه أبوها، بالتالي بيجد نفسه بيتعامل معاها على أنه المحامي بتاعها.

العنصر الأول من عناصر قوة (موضوع عائلي) هو ماجد الكدواني. غول التمثيل اللي ماقدمش دور واحد ضعيف في حياته! فيلموجرافيا منوعة بين الأكشن والاجتماعي والكوميدي، بدون ما يكرر نفسه ولو مرة واحدة. “ماجد” هو وعاء عميق يقدر يشيل أي دور ويتقمص الشخصية ويعيشها بأدق تفاصيلها. ويخلق لها لزماتها الكلامية والحركية، ودي حاجه شوفناها في (موضوع عائلي) بشكل مكثف.

 

عنصر القوة الثاني جنب الكدواني، هو أدوار البطولة. المسلسل بيخاطب فئات كتيرة ضمن أحداثه. مع تركيز على المراهقين والشباب من خلال ٣ شخصيات. رنا رئيس في دور البنت، و طه دسوقي الممثل الشاب اللي عمل إعلانات سابت علامة مع الناس وهو بالأساس ستاند أب كوميدي مشهور. وأخيرًا.. صولا عمر، اللي على الرغم من مشاهدها القليلة قدرت توقعنا على الأرض من فرط الضحك. صولا هي صاحبة أغنية (أبو أحمد) الشهيرة على يوتيوب، وفي رأينا هي مكانتش بتمثل في (موضوع عائلي) بقدر ما كانت بتقدم جزء من شخصيتها الحقيقية بكل ما فيها من حركات مطرقعة ومجنونة.

 

الصاروخ الثلاثي الموجه للشباب ده حقق أهدافه بشدة. بينما تولى فريق (الكدواني- محمد شاهين- محمد رضوان) دك قواعد تحصينات الدراما الأسرية في مقتل. لمخاطبة الجمهور الأكبر سنًا، واللي عاوز يتفرج على أداء تمثيلي ممتع بجد. مين المايسترو المسئول عن كل ده؟

 

أحمد الجندي.. المخرج والمشارك في التأليف كمان. واللي مش جديد عليه التعاون مع الكدواني لأنه كتب سيناريو طير أنت. وبيشارك الجندي في تأليف (موضوع عائلي) كريم يوسف، بنتكلم عن مؤلف مسلسلات نيللي وشيرهان ولهفة وقابيل. وغيرها من الأعمال الناجحة.

 

لما نحط كل العوامل دي مع بعضها جنب أن المسلسل من ١٠ حلقات بس، يعني مافيش تطويل ومط بدون داعي. بنكون قدام واحد من أحسن الأعمال اللي شوفناها مؤخرًا. خاصة أنه مسلسل ينفع يشوفه كل أفراد الأسرة بدون قلق، دراما عائلية من اللي بتجيب مواقف حقيقية بتحصل في بيوتنا. تركيز على تفاصيل الهدوم والديكور وحياة الطبقة المتوسطة المصرية بكل ما فيها من تفاصيل زي الأكل اللي الفول والطعمية والبتنجان بيلعبوا فيه أدوار البطولة، وحتى تفاصيل صغيرة زي (عضعضة) بطارية الريموت كنترول، وغيرها من التصرفات العفوية. كل ده خلى (موضوع عائلي) مسلسل خفيف على القلب، نقدر نرشحه لكم للمشاهدة بقلب جامد.