Mohammed Sabry
طبعًا كلنا تابعنا ماتشات كاس العالم. وأكيد شجعنا مصر وخصوصًا صلاح. تابعنا فرق تانية غير مصر باهتمام وشجعناها، أو توقعنا فوزها أو هزيمتها إلخ. والحماس كان واخدنا لأبعد الحدود مع كل مباراة. أو بمعنى تاني الفرجة على الماتشات كانت مأثرة على نفسيتنا أوي. طب هي فعلًا الكورة بتأثر على نفسيتنا؟
وأثبتت تقارير إن مشاهدة مبارايات كاس العالم الأخيرة، سببت زيادة في عدد نبضات القلب للمشجعين. وده بيخلينا نفتكر دراسات علمية سابقة اتكلمت عن فوائد وأضرار مشاهدة كرة القدم.
موقع “ذا فيرج” قال إن ساعات آبل الذكية سجلت أرقام عالية جدًا، في نبضات قلب المشجعين خلال مشاهدتهم لمباراة أنجلترا وكولومبيا الأخيرة. واللي انتهت بفوز إنجلترا بركلات الترجيح. وقال كمان إن مشاهدة كرة القدم تعتبر نوع من الهوايات الحيوية زيها زي الرياضة. وممكن تأثر بشكل إيجابي أو سلبي على صحة المشاهدين.
من فوائد كرة القدم تحسين الصحة النفسية. لما المواطنين بيحسوا بالانتماء بفضل فوز منتخب بلدهم اللي بيشجعوه. وكمان نشوة الانتصار بتزود شعور الثقة بالنفس عند المشجعين. وده بينعكس إيجابيًا على حياتهم.
أما عن أضرارها فممكن تأثر على صحة القلب، للمشجعين اللي بيعانوا ارتفاع نبضات القلب. وبالإضافة للتدخين وارتفاع ضغط الدم، ممكن تكون سبب في زيادة التعرض لأزمة قلبية.
ومن الأمثلة على كده، مباراة إنجلترا والأرجنتين في مونديال 1998. اللي أسفرت عن دخول 55 مواطن بريطاني للمستشفى، بعد تعرضهم لأزمة قلبية بسبب خسارة منتخبهم.
وفي كأس الأمم الأوروبية عام 1996، اتوفي 14 مواطن هولندي بعد خسارة منتخب بلادهم مباراة ربع النهائي أمام فرنسا بركلات الترجيح.
هي كده مشاهدة الساحرة المستديرة، دايما بتجمع بين تقلبات مختلفة. بين الحزن والفرح والسعادة والحماس والقلق.. بس دايمًا بنحبها.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
