ورطة إنسانية: برنامج مقتبس من “الصدمة” بتعرضه DMC

تليفزيون

21/06/2017

ورطة إنسانية: برنامج مقتبس من “الصدمة” بتعرضه DMC

بواسطة

Hager Eissa

وسط كل برامج مقالب رمضان وسباق المسلسلات والإعلانات ظهر نوع جديد من البرامج، نوع مش بيستفزك علشان تشتم أو تقول خد كام عشان يعمل كدا في نفسه نوع بيستفز الجانب الإيجابي فيك وده طبعًا عكس كثير من البرامج اللي ظهرت وأنتشرت في الكام سنة اللي فاتت في رمضان.

الصدمة

فعلي غرار البرنامج الشهير “الصدمة” واللي تم عرضه في رمضان السابق وتم تقديم موسم جديد منه في رمضان الجاري علي قناة MBC قدمت لنا قناة DMC برنامج “ورطة إنسانية”.

في بداية كل حلقة بتسمع صوت هاجر الإبياري وهي بتشرح سيناريو الحلقة هيكون ماشي أزاي وبعد كده بنتنقل للشارع في تجربة إنسانية جديدة.

هتعمل إيه في ورطة النهارده ؟

تصويره بسيط جدًا بحيث أنه بيتم زرع كاميرات في أماكن معينة في الشارع و افتعال مشهد تمثيلي والاستعانة بالجمهور للتفاعل، ومن هنا بتشوف مشاهد كثيرة حلوة لأن بمنتهي البساطة أنت بتتفرج علي مواقف بتستفز الأنسان اللي جواك وبتلاقي عنيك بتدمع من غير ما تحس ومخك علي طول بيفكر أنت لو مكان الشخص اللي أتعرض للورطة الأنسانية دي هيكون إيه تصرفك؟

10 دقايق لكل فئات المجتمع

مواضيع الحلقات متنوعة وبتخاطب كل شرائح وطبقات المجتمع المصري بكل الأعمار والهدف واحد وهو تجديد القيم الأنسانية والأخلاقية جوانا وأنك ترجع تشوف الجانب الإيجابي في الشارع المصري في برنامج مدته لا تتعدي 10 دقايق.

الأقتباس المفيد

وزي ما قلنا البرنامج فكرته مقتبسة من برنامج “الصدمة” و اللي حقق مشاهدات عالية جدًا ويمكن الفرق الوحيد أن الصدمة بينقل ردود الأفعال مش من بلد واحدة ولكن من بلدان عربية وأجنبية مختلفة.

في النوع ده بالذات من البرامج أعتقد أن مفيش مشكلة لو تم اقتباس فكرة البرنامج وده لأننا في ظل كل التحديات والعنف اللي بنشوفها يوميًا فأحنا بقينا في أشد الحاجة أننا نتفرج علي برامج تخلينا نرجع نتصرف بشكل مهذب ولائق مع بعضنا وترجعنا نتعامل تاني بالفطرة الإنسانية اللي جوانا. عشان كده نتمنى أن عدد البرامج اللي من النوع ده يزيد.

وإحنا بنعيب علي إدارة قناة DMC أنها مش عاملة دعاية كفاية للبرنامج وخلتنا نشوفه بالصدفة.