The Definitive Guide to Living in the Capital , Cairo , Egypt

رمضان موسم المسلسلات.. ودي حقيقة بتثبتها لنا كل سنة الكمية الكبيرة من المسلسلات اللي بتتصارع علشان تحقق نسبة مشاهدة عالية، وإحنا في كايرو 360 جمعنا لكم أفضل المسلسلات اللي ما ينفعش يفوتكم الفرجة عليها.

ليه اختارنا المسلسلات دي بالذات؟ لأننا اتعودنا من نجومها أنهم بيتعبوا علشان يختاروا لنا عمل كويس ومميز، كمان فريق الأعمال دي من مؤلفين ومخرجين أثبت نفسه في السنين اللي فاتت. وبنوضح إن ده رأينا الشخصي.

 

كفر دلهاب

 

 

المسلسل الجديد ليوسف الشريف، واللي بيشاركه بطولته روجينا ومحمد رياض، والحقيقة أن يوسف الشريف أصبح بيتعب جدًا في اختيار عمل كويس.

مسلسل كفر دلهاب من تأليف عمرو سمير عاطف اللي قدم لنا مجموعة من أهم المسلسلات في السنوات اللي فاتت. وده بيخلينا متأكدين إننا هنشوف عمل مميز متعوب عليه.

المسلسل تشويق وإثارة، وبيخرجه أحمد نادر جلال.

هتشوفه فين؟ على قنوات ONE

 

عفاريت عدلي علام

 

 

عادل إمام مش مجرد ممثل كوميدي، ده تاريخ طويل من إثبات الذات سواء في السينما أو في التليفزيون، وبدون شك مسلسلات عادل إمام الأخيرة كانت قوية وقدرت تجمع حواليها ملايين من المصريين والعرب.

السنة دي عادل إمام هنشوفه في مسلسل عفاريت عدلي علام وده دراما اجتماعية كوميدية. وده أكتر لون إمام بينجح فيه.

المسلسل من بطولة غادة عادل وهالة صدقي ولطفي لبيب وعدد ضخم جدًا من النجوم. والقصة ليوسف معاطي والإخراج لرامي إمام.

هتشوفه فين؟ على MBC مصر

 

الزيبق

 

 

كريم عبد العزيز هنشوفه السنة دي في مسلسل مأخوذ من ملفات المخابرات المصرية، وهو مسلسل الزيبق اللي بيشاركه بطولته الممثل شريف منير وطلعت زكريا وريهام عبد الغفور.

كريم عبد العزيز بيختار أعماله بعناية شديدة وبيحاول يقدم أدوار مختلفة كل مرة، ومش هننسى له أعمال حلوة زي أولاد العم.

المسلسل تأليف وائل عبد الله ووليد يوسف ومن إخراج وائل عبد الله.

هتشوفه فين؟ على On E

 

لا تطفئ الشمس

 

 

قصة الكاتب الكبير إحسان عبد القدوس واللي اتعرضت في فيلم قبل كده  بنفس الاسم بطولة نجوم كبار زي فاتن حمامة وشكري سرحان وأحمد مظهر. مسلسل لا تطفئ الشمس  السنة دي هيكون مفاجأة بمعالجة وسيناريو تامر حبيب وإخراج محمد شاكر وبطولة النجمة ميرفت أمين ونجوم شباب زي محمد ممدوح ، أمينة خليل وأحمد مالك وجميلة عوض.

هتشوفه فين؟ MBC مصر

 

طاقة نور

 

 

مسلسل الداعية لهاني سلامة حقق نجاح كبير لما عرض لأول مرة عام 2013 والسنة دي هاني راجع لنا بمسلسل تشويقي مميز وهو طاقة نور واللي كتب قصته حسان دهشان وأخرجه رؤوف عبد العزيز.

المسلسل من بطولة حنان مطاوع وميس حمدان وصلاح عبد الله ووليد فواز ومجموعة كبيرة من النجوم.

هاني سلامة من الممثلين اللي بيختاروا أعمالهم بعناية شديدة، وبيحب يقدم حاجة مختلفة، وده من بداية ظهوره في أول أعماله المصير مع يوسف شاهين.

هتشوفه فين؟ On E

 

هربانة منها

 

 

ياسمين عبد العزيز قدمت مجموعة حلوة من أفلام السينما الكوميدية واللي بتتميز إنها مناسبة لكل أفراد الأسرة، السنة دي هنشوف ياسمين مع مصطفى خاطر في مسلسل كوميدي من إخراج معتز التوني اللي قدم لنا السنة اللي فاتت مسلسل نيللي وشريهان وحقق نجاح كبير جدًا.

أكيد خاطر وياسمين هيعملوا خلطة حلوة تناسب كل أفراد الأسرة.

هتشوفه فين؟ On E

 

لأعلى سعر

 

 

ناس كتير أصبحت بتنتظر أي عمل جديد لنيللي كريم، والسنة دي هنشوفها في مسلسل “لأعلى سعر” واللي بيشاركها بطولته أحمد فهمي وبشرى ونبيل الحلفاوي ومي كساب.

المسلسل اجتماعي رومانسي وكتب قصته مدحت العدل وأخرجه محمد العدل. ونيللي بتحاول من خلال المسلسل ده تقول إنها ممثلة قوية وتبعد شوية عن المسلسلات الكئيبة من نوعية تحت السيطرة وسقوط حر.

هتشوفه فين؟ DMC

 

واحة الغروب

 

 

رائعة بهاء طاهر اللي حققت أعلى المبيعات في المكتبات المصرية وهي رواية واحة الغروب هنشوفها السنة دي كمسلسل من بطولة منة شلبي وخالد النبوي وبيشاركهم البطولة سيد رجب ومنذر رياحنة وصفاء الطوخي.

وطبعًا اسم بهاء طاهر كافي جدًا إنه يخلينا نتوقع إننا هنشوف مسلسل مميز.

هتشوفه فين؟ DMC

 

حلاوة الدنيا

 

 

هند صبري وظافر العابدين في مسلسل كتب قصته ورشة كتابة شارك فيها عدد كبير من الشباب الموهوبين تحت قيادة تامر حبيب.. أكيد هتكون تجربة مختلفة تستحق نتفرج عليها.

المسلسل بيشارك في بطولته مصطفى فهمي وحنان مطاوع وأنوشكا وعايدة رياض. ومن إخراج حسين المنباوي.

هشتوفه فين؟ CBC

 

عشم إبليس

 

 

عمرو يوسف قدم لنا أكتر من عمل مهم السنين اللي فاتت، ومسلسله الجديد بخط إيدي أكيد هيكون تجربة مميزة، المسلسل من تأليف محمد عبد العزيز وماريان هاني وحميد المدني ومن إخراج إسلام خيري وبيصنف كدراما وتشويق.

هتشوفه فين؟ MBC مصر