The Definitive Guide to Living in the Capital , Cairo , Egypt

من ساعة ما بدأ برنامج “أبلة فاهيتا” على قناة سي بي سي، وهو شاغل بال ناس كتير. ما بين مؤيد للبرنامج وبيحبه، وبين معارض للمحتوى اللي بيتقدم. لكن اللي ناس كتير مشغولة به وبتسأل عليه، هو تفاصيل البرنامج. بيتصور فين وإزاي؟ مين صاحب صوت أبلة فاهيتا؟ يا ترى هو خالد منصور زي ما بيقولوا؟ كايرو 360 راحت التصوير، وجابت لكم كل التفاصيل دي وأكتر. هتعرفوها في الكام سطر اللي جايين، فركزوا معانا بقى:

المكان

تصوير حلقات أبلة فاهيتا بيتم في مسرح راديو اللي في وسط البلد. نفس المكان اللي كان بيتصور فيه برنامج “البرنامج” بتاع باسم يوسف.

الدعوات

دعوات الحضور بتكون كلها دعوات خاصة. عن طريق شركة JWT أو فريق العاملين بالبرنامج، سواء معدين أو مخرجين. يعني حد من العاملين بياخد اسمك والإيميل بتاعك، ويحطهم في قائمة المدعوين. وبعد كده بيوصلك إيميل بالدعوة بتاعتك.

الاستقبال

بداية الدخول من بوابة المسرح بتكون على 8 أو 8:30 كده، لما يبدأ الجمهور يوصل. وانت داخل من الباب ممكن يتطلب منك تفتح الميل اللي مبعوتلك فيه الدعوة. بعدها في حد بيكون قاعد على مكتب بيتأكد من وجود اسمك وأسماء الناس اللي جاية معاك. بعد كده في حد من المنظمين هايشرحلك شوية قواعد بسيطة زي ممنوع دخول الأكل للمسرح وتسليم الموبايل قبل الدخول.

كل الحضور بيتجمعوا في ساحة كبيرة بين البوابة والمسرح من جوة في انتظار الدخول. بيتصوروا مع بورتريهات الأبلة ومع بعض. وكمان في مكان بيبيع مشاريب مختلفة وسندوتشات، بس الأسعار غالية حبتين.

دخول المسرح

على 9:30 تقريبًا بيتفتح باب المسرح ويبدأ الجمهور في الدخول. وانت داخل بتسلم الموبايل بتاعك وبتاخد رقم علشان تاخده وانت خارج. في راجل بيفتش الرجالة، وبنت بتفتش البنات اللي داخلة. كنوع من التأكيد على عدم دخول أي حاجة زي الكاميرات والأكل وغيره. بعدها في حد من المنظمين بيدخلك للمكان اللي هتقعد فيه.

تصوير الحلقة

بعد ما كل الناس تدخل ويقعدوا في أماكنهم، بتتفتح الستارة على الساعة 10:30. وتبدأ الحلقة بالترتيب اللي انتوا عارفينه. وهو الجزء الأول مجموعة أخبار بتقولها الأبلة. الجزء التاني لقاء “كارو” مع الضيف. الجزء التالت لقاء “أبلة فاهيتا” مع الضيف. وطبعا في المسرح لو حصل أي غلطة التصوير بيتعاد من تاني. لكن ده مش بيحصل كتير. وللأسف الشديد الشخص اللي بيعمل أبلة فاهيتا أو كارو مش بيظهروا قدام الجمهور خالص. وبعد كل فقرة الستارة بتتقفل، لحد ما يجهزوا ديكور الفقرة اللي بعدها.

فاهيتا وكارو

نيجي بقى للسؤال اللي حير ناس كتير أوي، مين الشخصية اللي بتعمل فاهيتا وكارو؟ ويا ترى صاحب الصوت راجل ولا ست؟ سمعنا افاتكاسات كتيرة أوي، وأكتر حاجة اتقالت إن خالد منصور وشادي ألفونس اللي كانو مع باسم يوسف هم اللي بيعملوا الأصوات. لكن كل ده مش صح. اللي بيعمل صوت فاهيتا هو “حاتم الكاشف”. أما كارو فبيعمله “شادي عبد اللطيف”. والاتنين مش بيظهروا خالص في المسرح ولا حتى في أي مكان تاني في الإعلام. ولحد دلوقتي متكتمين على شخصياتهم الحقيقية بشكل كبير. يمكن علشان ده هيأثر على نجاح شخصية أبلة فاهيتا.

التسجيل مع الجمهور

بعد انتهاء التصوير اللي بيستمر لحوالي ساعتين، بيبدأ الجمهور في الخروج من المسرح. وهنا بيكون في حد من فريق الإعداد بيسجل مع الجمهور ويسألهم أسئلة بخصوص موضوع الحلقة. ودي اللي بتظهر في تتر النهاية بتاع البرنامج.

هي دي كل التفاصيل بتاعت البرنامج، يا ترى تحبوا تعرفوا إيه تاني؟