-
طبخ
-
من الآن
-
سعيد خليلسعيد خليل
Rasha Zeidan
هو برنامج عالمى، يعنى مش فكرتنا، وفى إعلان البرنامج موضحين الفكرة دي، البرنامج تم عرضه فى أمريكا، وبعدها بريطانيا والصين وبلاد ثانية كثير لغاية ما وصل مصر، مبدأ البرنامج بسيط، مسابقة بـ تعتمد على الطعم بس فى ملعقة واحدة مش فى طبق، البرنامج بـ يضم مشتركين هواة ومحترفين فى فن الطبخ من مصر وباقى أنحاء العالم العربى.
تعالوا بنا نشوف خط سير البرنامج: فى الأول بـ تكون مرحلة التجارب واللى فيها بـ يكون كل مشترك معاه ساعة واحدة علشان يطبخ أكلة من اختياره ويقدمها للجنة التحكيم واللى بـ تتكون من 4 من أهم المختصين فى فن الطهى فى الوطن العربى هم: علاء الشربينى شيف من مصر، ومنى موصلى شيف من المملكة العربية السعودية، وبيثانى كعدى مستشارة للمطاعم وسيدة أعمال، وأنيسة الحلو مستشارة وخبيرة بثقافة المطبخ فى بلدان البحر المتوسط.
الحكام هـ يذوقوا الطعم ويقرروا لو عاوزين المشترك فى فرقتهم أو لأ… وكل ده بـ يتم من غير الحكام ما يشوفوا المشترك وما ينفعش يرجعوا فى رأيهم بعد ما يشوفوا المشترك والموضوع ده ممكن يكون سلاح ذو حدين، الأول أنه بـ يعتمد على الحيادية وأن الطعم فعلاً هو الأساس، والثانى ممكن المتسابق يقنع الحكم بطبقه أو ملعقته وممكن يحصل ظروف خارجة عن إرادته مثلاً زى متسابقة حصل لها حادثة قبل الاختبار بأربعة أيام وعلى لسان الشيف علاء أنه لو كان شافها قبل ما يحكم على الملعقة كان اختارها حتى من غير ما يتذوق.
طيب إيه اللى هـ يحصل لو الحكام الأربعة ما عجبهمش الطعم؟ فى الحالة دي مشوار المشترك بـ ينتهى فورًا، طيب لو حكم واحد عجبه الطعم؟ بـ يضمه لفريقه، ولو أكثر من حكم حب الأكلة المشترك هو اللى هـ يختار الحكم.
وعلى مدى حلقتين من مرحلة التجارب هـ يتم اختيار 20 مشترك (بواقع 5 مشاركين فى فريق كل حَكَم) وفى النهاية واحد بس هو اللى هـ يفوز بالجائزة الكبرى وهـ يتقاسم كأس البرنامج مع حكم فريقه.
كل مشترك بـ يكون فيه تقرير مبسط عنه بـ يعرفنا جنسيته وتاريخه مع الطبخ، والجميل فى البرنامج أنه مش محدد سن المشترك يعنى الشباب موجود وكبار السن كمان، البرنامج كمان بعد مرحلة التجارب هـ يبدأ فى التصفيات وفى كل حلقة هـ يستضيف واحد من أكبر الشيفات.
برنامج THE TASTE فى نسخته العربية وجهة مشرفة للإعلام العربى من حيث اختيار حكام على علم وفن وذوق، وإنتاج ضخم للبرنامج وذوق مختلف بـ يبان فى الإضاءة والديكورات المختلفة والإخراج اللى مش سايب تفصيلة.