The Definitive Guide to Living in the Capital , Cairo , Egypt

ركوب الدراجات (العجل)، واحدة من الهوايات الجميلة، واللي ليها فوائد صحية ونفسية كتيرة جدًا. لكن بسبب الزحمة الشديدة في القاهرة، ناس كتير بتفضل تبعد عن الهواية دي رغم أهميتها!

في الموضوع ده هنعرفكم على 5 أماكن في القاهرة هتقدروا تجروا فيهم بالعجلة بكل حرية وأمان.

 

حديقة الدراجات

نقدر نقول إن حديقة الدراجات (بايكس بارك) في مدينة المستقبل أجمل حديقة في القاهرة لعشاق ركوب العجل، والحديقة اللي بتزيد مساحتها عن 210 فدادين، فيها مسارات للدراجات بطول 3 كيلومتر، وساحة خاصة للرَّكْن.

والحديقة موجودة في مدينة المستقبل على طريق الإسماعيلية الصحراوي، والهدف منها هو التشجيع على رياضة ركوب الدراجات.

 

مدينة الشروق

مدينة الشروق أصبحت واحدة من أجمل المدن الجديدة في القاهرة اللي تم تخطيطها بشكل بيحترم ثقافة ركوب العجلة! ومؤخرًا انتهت الحكومة المصرية من تخطيط حارات مرورية لمسارات الدراجات في أغلب طرق المدينة، والهدف هو تشجيع المصريين بصفة عامة، وسكان المدينة بصفة خاصة، على ممارسة رياضة ركوب الدراجات الهوائية (العجل) بكل حرية.

منطقة دجلة في المعادي

بتتميز منطقة دجلة بالمعادي، بوجود مساحة كبيرة وهادية لممارسة رياضة ركوب الدراجات، خاصة في المنطقة من ميدان دجلة ولحد ميدان فيكتوريا، ده غير شوارع المنطقة زي شارع 213، وهناك هتشوف عدد كبير من المصريين والأجانب بيتحركوا بالعجل.

 

الأهرامات

بتعتبر منطقة الأهرامات خصوصًا في الطريق المؤدي لدهشور، واحدة من الأماكن المناسبة لممارسة ركوب الدرجات في القاهرة، وده بسبب بُعدها النسبي عن المناطق السكنية والازدحام المروري في العاصمة المصرية، ومافيش أجمل من إنك تركب عجلتك وتشوف أهرامات مصر العظيمة في نفس الوقت.

 

كوبري قصر النيل ووسط البلد

على الرغم من الزحمة الشديدة اللي بتعاني منها منطقة وسط البلد، لكن هتفضل المنطقة دي من أجمل الأماكن المناسبة لممارسة رياضة ركوب الدراجات، خصوصًا في أيام الإجازات والويك إند، وتحديدًا يوم الجمعة، وأجمل حاجة إنك هتستمتع هناك بمنظر نيل مصر العظيم الصبح بدري.