The Definitive Guide to Living in the Capital , Cairo , Egypt

في حياة كل واحد فينا شخص ليه مكانة في قلبنا، مش بس علشان قريب مننا، لكن علشان بيشجعنا وبيفهمنا، وأوقات كتير بيكون هوه السبب في اكتشاف موهبتنا، والشخص ده في حياة “محمد صلاح” كان الكابتن “حمدي نوح” لاعب المقاولين السابق، ومكتشف “محمد صلاح”.

اللي وصل ليه “صلاح” من نجاح وتفوق يشهد له بيه العالم كله دلوقتي، كان سبب سعادة كبيرة جدًا لكابتن “نوح” اللي وصف صلاح بإنه “ابن من أبناؤه” وإنه برغم كل النجاح والشهرة دي، إلا إنه إنسان متواضع جدًا ومن زمان.

كلام كابتن “نوح” كان في مكالمة لبرنامج “هنا العاصمة” بمناسبة عيد ميلاد “صلاح” واللي كانت مناسبة وفرصة مهمة إنه يكمل فيها كابتن “نوح” تشجيعه لـ “صلاح” ويقوله “كل سنة وانت طيب، والسنة الجاية أهنِّيك بحصولك على الكرة الذهبية لأحسن لاعب في العالم”.

وعن سبب التوفيق اللي محالف صلاح في مشواره، قال كابتن “نوح” إن “صلاح” ربنا موفقه عشان هو طيب جدًّا، وعلشان كده ربنا ادّاله الإنجازات دي، وكل ما اسم صلاح يكبر بيفضل منتمي لنادي المقاولين العرب، وأنا ماعملتش مع صلاح غير الطبيعي اللي بيتعمل مع أي موهبة زيّه”.

وعلى كلام موهبة “صلاح” فكان الكابتن “نوح” ليه دور كبير في تنمية الموهبة دي في أول أيامها، وأكد على إن “صلاح” عنده موهبة بالفطرة، وإنه باعتباره كان الكابتن المسؤول عن تدريب صلاح، فكان لازم يطور موهبته، هوه وكل المدربين اللي مرّنوه كمان، واللي يستاهلوا التكريم.

 “محمد صلاح قادر يقف تاني مهما وقع” بالكلمات دي ختم كابتن “نوح” كلامه عن “صلاح” واللي أكد فيها على إن ثقة صلاح في ربنا وفي نفسه، أهم حاجة بتميزه، ده غير إنه بيقول دايمًا حاضر ونعم، وبيختزل كل الأمور السلبية والإيجابية، وبيقدر يحافظ على مكانته، وعلشان كده هو دايمًا يستحق التكريم وإننا كلنا نقف معه.