The Definitive Guide to Living in the Capital , Cairo , Egypt

ماتتخضوش من العنوان، عادي هتستحموا في الشتاء، والحياة هتبقى حلوة، وكمان ممكن تستحموا مرتين لو عاوزين، بس أهم حاجة، جمدوا قلبكم، وحافظوا على نفسكم، وماتفردوش عضلاتكم علشان الغلطة هيكون ثمنها نزلة برد ورشح وصداع وليلة مش هنخلص فيها، وعلشان كدة هنقولكم في السطور الجاية على نصائح للاستحمام في الشتاء بطريقة علمية سليمة، تحميكم من أي خطر.

أول حاجة إحنا بننصحكم أنه بلاش مياه ساقعة نهائي، مافيش حاجة اسمها متعودين، لأن الاستحمام في الشتاء بالمياه الساقعة مضر جدًا، وبيعمل ضيق في الأوعية الدموية، وبيرفع الضغط، وكمان المياه السخنة قوي بتعمل هبوط في الدورة الدموية فبلاش منها بدل ما يغمى عليكم، والحل بقى في المياه الدافية الحلوة، لا منها ساقعة ولا منها سخنة، هي وسطية جميلة وهترضينا.

لكن قبل ما تدخلوا للاستحمام لازم بقى تدفوا الشقة كويس، وتقفلوا كل منافذ الهواء علشان ماتتأذوش من التيارات وسراسيب الهواء، علشان بمجرد خروجكم من الحمام بتكونوا أكثر عرضة للإصابة بأمراض الشتاء، وكمان لازم تدفوا الحمام كويس، وشغلوا المياه بتاع 5 دقائق كده وباب الحمام مقفول علشان متقلعوش في درجة حرارة منخفضة.

نبدأ بقى نستحمى وربنا يعينا ويعينكم، لازم تخلوا بالكم من درجة الحرارة طبعًا وتبقى مظبوطة ودافية زي ما قلنا فوق، وقبل ماتنتهوا من الاستحمام قللوا من درجة السخونة حاجات بسيطة، بحيث إنكم لما تخرجوا ماتلاقوش صعوبة في التعود على الجو.

أوعوا تنسوا تتنشفوا كويس خاصة الشعر، وماتخلوش جسمكم مندي، وتلبسوا حاجات تقيلة، وتلبسوها بسرعة شوية، علشان إحساس الفترة بين قفل المياه واللبس ده ما يتوصفش، أوعوا تفكروا تجربوه، الرعشة هتزعلكم، وبعد ما تلبسوا افتحوا الحمام فتحة صغيرة خرجوا البخار، علشان تحسوا بدرجة حرارة الجو بشكل تدريجي.

وبعد ماتخلصوا الاستحمام، اشربوا كوباية مياه من الحنفية، قبل ما تخرجوا من الحمام، وعلشان تحسوا بالاسترخاء والدفا، اشربوا سوائل سخنة، علشان تقدروا تناموا مرتاحين بعدها، وماتنسوش أن أفضل مواعيد الاستحمام هي قبل ما تدخلوا تناموا مش الصبح بدري.

نتمنى لكم كل الصحة والسلامة.