The Definitive Guide to Living in the Capital , Cairo , Egypt

صحة ولياقة

الفول.. اعرفوا فوائد أشهر طبق على السحور

ألياف رمضان 2020 سحور فوائد فوائد طبق الفول فول فيتامينات معادن
الفول.. اعرفوا فوائد أشهر طبق على السحور
بواسطة
Mohamed Talaat

طبق الفول ضيف دائم على سفرة المصريين خصوصًا على سحور رمضان، وبصفة عامة هو الوجبة الشعبية الأولى في مصر، وتاريخيًا تم اكتشاف الفول في عصر القدماء المصريين، واكتشفت بذوره في قبور الأسرة الـ12 بسقارى وأوشيم، والبذور دي محفوظة لحد النهارده في المتحف الزراعي في الدقي.

في الموضوع ده، هنعرفكم على فوائد الفول وليه لازم يكون وجبة أساسية في السحور، وده من خلال حوار خاص مع طبيبة مصرية.. يلا نبدأ.

الدكتورة سوزان فتحي، الطبيبة بمستشفى المعادي العسكري، قالت لـ كايرو 360 إن الفول مفيد جدًا لمرضى الضغط والسكر والقلب، وهو وجبة تكاد تكون متكاملة، وبتحتوي على أغلبية الألياف والبروتينات اللي بيحتاجها الجسم، وكمان بيتسمى بوجبة الطاقة، لأن فيه بروتين وحديد ومعادن وفيتامينات.

وبحسب الدكتورة سوزان فإن لجوء المصريين للفول على وجبة السحور بيكون بسبب معرفتهم لأهميته وفوائد الكتيرة جدًا، ولرغبتهم في الحفاظ على طاقة الجسم خلال وقت الصيام، وده اللي بيعمله الفول، واللي بيقدر يحافظ على مستوى السكر في الدم.

كمان الفول فيه فيتامين B، وده مهم للطاقة ولأعصاب الجسم، ووجبة الفول بتخلينا نتحرك كويس من غير ضعف طوال فترة الصيام، وكمان الفول فيه ماغنيسيوم وبوتاسيوم، والنوعين دول من المعادن مهمين لأنهم بيعملوا انبساط  لشرايين الجسم والقلب، وبيضخ الدم بشكل مظبوط.

ووضحت الدكتور سوزان فتحي، إن الفول فيه حديد ومنجنيز، وده مفيد للناس اللي عندهم هشاشة لأنه بيحسن حالتهم نوعًا ما، ومهم للناس اللي عندهم أنيميا حديد، لأنه بيساعدهم في تقليل أعراض الأنيميا.

كمان أكدت لنا الدكتورة سوزان إن الفول مهم جدًا حتى للناس اللي بتعمل دايت، بسبب إن فيه سعرات حرارية أقل مع طاقة أكبر.

وإحنا في كايرو 360 بنشجعكم تاكلوا فول، بس من مكان مضمون، أو الأفضل والأصح تعملوه في البيت، وكل سنة وأنتم طيبين.

مقترح