The Definitive Guide to Living in the Capital , Cairo , Egypt

الصورة من رصيف 22

مين فينا مافيش في حياته عربية فول كانت الملجأ والملاذ بالنسباله في أيام “الكحرتة” الصعبة، ومع الوقت اتوطدت العلاقة بينه وبينها لدرجة إنه مابقاش شايف غيرها في الشارع؟ طيب مين فينا لسه على وعده لحد النهارده مع عربية “الفول” ومهما كبر مرتبه عمره ما بيكبر عليها؟؟ أظن احنا كتير مش كده؟!

طيب بما إننا كتير، فوجب التنويه والتحذير والتأكيد على حاجات مهمة ومتعلقة بعربيات الفول الموجودة في الشارع، وكشف عنها مؤخرًا مسؤول في المعهد القومي للتغذية، واللي كان من أهمها تسبب أكل الشارع بشكل عام، وعربيات الفول بشكل خاص في انتشار أنيميا الحديد أو فقر الدم بسبب نقص الحديد.

الكلام ده أكد عليه الدكتور “مجدي نزيه” رئيس وحدة التثقيف الغذائي في المعهد القومي للتغذية خلال مداخلة تلفونية معاه على قناة “one” قال فيها إن أهم أسباب انتشار “أنيميا الحديد” في مصر بيرجع للتلوث وسوء التغذية، وإن “فول الشارع” من أهم أسباب انتشار أنيميا الحديد في مصر بصورة وصفها بإنها “غير مبررة”.

الدكتور مجدي لفت النظر لمعلومة مهمة، وهي ضرورة إن الفول وجميع أنواع البقوليات “تتنقع” في الماء لمدة 12 ساعة على الأقل؛ أو لحد ما تظهر الرغاوي البيضاء على وش الماء المنقوع فيه، وبعد كده بنرمي الماء، ونغسلها ونستخدمها، وده أكيد مش اللي بيحصل مع فول الشارع، لإن صاحب العربية أكيد مش هيستنى 12 ساعة، وبالتالي فول الشارع لا بيتغسل ولا بيتنقع، وده تحديدًا اللي بيعيق امتصاص الجسم للحديد.

أما مشكلة فقر الدم أو الأنيميا الناتجه عن نقص الحديد فبتعد أحد أنواع فقر الدم المنتشرة، وهي عبارة عن حالة بيعاني الدم فيها من نقص شديد في خلايا الدم الحمراء السليمة، واللي بتلعب دور مهم في نقل الأوكسجين لأنسجة الجسم.

يا ترى بعد الكلام ده، لسه على موقفك من عربية الفول؟؟