The Definitive Guide to Living in the Capital , Cairo , Egypt

القهوة مشروب مايختلفش عليه اتنين، وعشاقها في عالمنا كتير، ومن أشهر اللي كانوا بيشربوا قهوة بشراسة، الموسيقار العالمي “بيتهوفن” اللي كان متعود يصنعها بنفسه يوميًا من 60 حبة بن، وكمان الفيلسوف الفرنسي الشهير “فولتير” اللي عاش 83 سنة ويوميًا كان بيشرب 50 فنجان قهوة.

وخلال السطور الجاية هنقول لكم على 7 حقائق طبية عن فنجان القهوة، واللي هتخليكم لازم تشربوا القهوة.

تحسين آداء الدماغ

القهوة بتزود التركيز واليقظة والانتباه، وطبقًا للدراسات العلمية لو أنتم شربتم القهوة مع السكر، هتتحولوا لعباقرة، لأن مزيج الكافيين والجلوكوز بيفعل مناطق محددة في المخ، بس أهم حاجة ماتشربوهاش على معدة فارغة لأنها هتعمل نتائج عكسية.

رفع ضغط الدم

لو بتعانوا من انخفاض ضغط الدم، ففنجان قهوة واحد هيرفع لكم الضغط، ولكن خلوا بالكم العلماء والمتخصصين نصحوا أن لو فيه سرعة في نبضات القلب فبلاش منها، وكمان هي مفيدة للمرضى بارتفاع الضغط الشرياني، لأن الجسم بيتعود عليها مع الوقت، فبتظبط الضغط وتخليه في وضعه الطبيعي.

بتقوي المناعة

علماء كتير أكدوا أن القهوة بتقلل خطر الوفاة المبكر، وأن كل ما زادت عدد الفناجين اللي بتشربوها يوميًا كل ما الخطر ده بيزول، لأن القهوة بتقوي جهاز المناعة، وكمان القهوة ليها تأثير إيجابي على الكبد والقلب والجهاز الهضمي، أهم حاجة تكون قهوة طبيعية مطحونة جديد، وابعدوا عن القهوة سريعة الذوبان اللي فيها مواد مغذية وإضافات كيماوية بتضر الجهاز الهضمي.

بتعالج الصداع

الكافيين اللي موجود في القهوة الطبيعية، بيعالج الناس اللي عندها صداع كلي أو نصفي، صحيح مش زي المسكنات والأدوية، ولكن تقدروا تقولوا أن القهوة بتعالج بنسبة 40%.

بتقلل التوتر والاكتئاب

كمان القهوة بتعالج التوتر، لأنها بتحفز إفراز النواقل العصبية “الدوبامين والسيروتونين”، ودول المسئولين عن تحسين المزاج، يعني فنجان قهوة يقدر يحسن مزاجكم السيء، وكمان الكافيين محفز للجهاز العصبي، اللي بيحمي من الاكتئاب، ودي ميزة موجودة في القهوة بس ومش موجودة في كافيين الشيكولاتة والشاي.

تحسين الذاكرة

أثبتت الاختبارات أن القهوة كمان بتحسن من عمل الذاكرة، وبالتحديد الذاكرة “قصيرة الأمد”، لأن المعلومات اللي بناخدها بتتخزن فيها الأول قبل ما تتنقل للذاكرة الطويلة الأمد بعد ساعة.

نقص الوزن

ومن ضمن الحقائق المثبتة أن القهوة هتساعدكم على إنقاص الوزن، لأنها بتمنع زيادة الوزن، لأن حبيبات البن بتحتوي على هرمون “اللبتين” اللي مسئول عن الشبع، وبتزوده في جسم الإنسان، وعلشان كده مدمني القهوة جسمهم مش بيزيد أو بيزيد ببطئ جدًا ولو بيلعبوا رياضة بياخدوا نتيجة كويسة جدًا في وقت قصير.