The Definitive Guide to Living in the Capital , Cairo , Egypt

القاهرة فيها شخصيات ملهمة كتير، بنتعلم منها النجاح والإرادة.. ومن الشخصيات دي عمر حجازي، وهو شاب مصري حقق بطولات في السباحة وتسلق الجبال، وهو من متحدي الإعاقة.

عمر حجازي اتعرض من حوالي 3 سنين لحادثة فقد بسببها قدمه، لكنه رفض يستسلم لإعاقته وقرر يخليها حافز له في ممارسة الرياضة بشكل احترافي.

عمر ظهر مؤخراً مع الإعلامية إيمان الحصري في برنامج مساء dmc اللي بتعرضه فضائية  dmc وحكى تفاصيل إنسانية جميلة عن حياته وبطولاته.

عمر حجازي مارس رياضة السباحة وحقق إنجاز كبير فيها لمسافة 20 كيلو متر خلال خليج العقبة من الأردن ولحد ميناء طابا المصري، وحقق رقم مميز في بطولة إنجلترا المفتوحة للسباحة.

الجميل إن عمر مارس رياضة تسلق الجبال رغم خطورتها، ومن خلال الاختيار ده حب يقول للناس كلها إن مافيش مستحيل وكل شيء ممكن بالصبر والإرادة والتدريب.

وفي الفترة الجاية عمر بيستعد لمغامرة كبيرة في مصر هيبدأها نهاية شهر نوفمبر في شبه جزيرة سيناء، واللي من خلالها هيعبر خليج العقبة بالسباحة لمدينة طابا وبعدها هيتحرك من مدينة طابا بدراجة هوائية لحد ما يوصل لأهرامات الجيزة، والحدث ده بيعتبر الأول من نوعه في مصر.

من كايرو 360 لعمر حجازي: شكرًا يا بطل.