The Definitive Guide to Living in the Capital , Cairo , Egypt

كتب: محمد صبري

لما تكون منظم مش بس معناه إن حاجتك تبقى مترتبة، لكن تبقى في متناول إيدك كمان. وتقدر توصلها في أي وقت. دي 10 نصايح هتساعد في الحصول على أكبر قدر من التنظيم:

حط كل حاجة في مكانها

سواء الحاجة دي في بيتك، أو مكتبك، أو مطبخك، أو أي مكان يخصك. لازم تحدد مكان لكل شيء وتبقى عارف إيه اللي موجود هناك. واتخلص من أي حاجة مالهاش لزمة، ووفر مكانها لحاجة مهمة.

رجع كل حاجة زي ما كانت

لما تخلص استخدام حاجة من أدواتك، لازم ترجعها مكانها بشكل منظم زي ما كانت. ده أكيد أحسن من شوية حاجات متوزعة في كل حتة بدون ترتيب.

صنف المحتويات المتخزنة

لما بتحط شوية ملفات أو ورق أو أي حاجة تانية في صندوق، من غير ماتحدد إيه اللي جواه. هاتنساها بالكتير خلال أسبوع. إنما لما تكتب على صندوق مثلا “لمبات”، وصندوق تاني “فواتير”. هاتسهل الموضوع عليك.

خصص مساحة للحاجات اللي محتاجة تتنظف أو تتصلح

اعمل مكان للحاجات اللي مش فاضي تخلصها دلوقتي، وهاتفضى لها بعدين. وساعتها لما تكون مستعد لها، مش هتكون محتاج تدور عليها في كل حتة في البيت. زي مثلا خلاط عايز يتصلح أو لمبة هتركبها.

بلاش تشتري أي شيء انت مش محتاجه

مش علشان تقدر تشتري عباية كشمير بسعر رخيص، أو 3 زجاجات كاتشاب بسعر واحدة، يبقى انت ملزم تشتري. اسأل نفسك الأول هل انت محتاجها؟ هل عندك مكان لتخزينها؟ هل هتأثر عليك لو ماشتريتهاش؟

اتمسك بس باللي يفيدك

في ناس عندها هوس شراء الموبايلات الجديدة، أو تجربة أي لبس ينزل جديد ولو بسعر عالي، وغيرها. كل دي حاجات بتضيع الوقت الفلوس من غير أي فايدة تعود على صاحبها.

وزع وقتك ومجهودك بشكل سليم

الأشخاص الناجحين بيوزعوا وقتهم وجهدهم بالتساوي على الأعمال المهمة: كلمة مهمة هيتم إلقائها – إنجاز عمل ضروري – إعادة تصميم الكتب.. إلخ. أما للأعمال الفرعية، فبيقوموا بس اللي ينجز المهمة. وده بيوفر وقت وجهد لحاجات أهم.

حدد موعد ثابت لإعادة التنظيم

بدل ما تستنى لحد ما مزاجك يروق (وطبعًا كلنا عارفين ده أخرته إيه). حاول تحدد ميعاد ثابت لتنظيم شوية أمور. زي مثلا: تخصيص 15 دقيقة بعد الشغل تصنف فيهم الإيميلات – مراجعة احتياجات البيت في نهاية اليوم، لليوم اللي بعده.

ماتتكسفش تطلب المساعدة

أحيانًا طلب المساعدة من الآخرين بيبقى له دور كبير في إنه يزيل أعباء كتير عليك. اطلب المساعدة من أصحابك او الناس اللي بتثق فيهم، لو متأكد إنهم هينجزوا مهمة معينة بشكل أفضل منك.

اعرف مكان ثابت تتبرع فيه

هايكون أسهل عليك تستغنى عن ممتلكاتك اللي مش محتاجها، لما تبقى عارف إنها هتروح في المكان الصح. زي هدومك أو هدوم ابنك اللي صغرت عليه، وانت عارف انها تناسب ابن حد تاني محتاجها. أو اختار مؤسسة خيرية محل ثقة، تتبرع فيها بحاجتك. ده هايوفر عليك إنك تدور كل مرة هتعمل إيه.

مصدر المقال بلوجر “تطوير الذات“.