The Definitive Guide to Living in the Capital , Cairo , Egypt

صحة ولياقة

سؤال محير العالم.. ليه مصر الأولى عالميًا في لعبة الاسكواش؟

اسكواش بطولة العالم رنيم الوليلي محمد الشوربجي مصر نور الشربيني نيويورك تايمز
سؤال محير العالم.. ليه مصر الأولى عالميًا في لعبة الاسكواش؟
بواسطة
Mohamed Talaat

ياترى إيه هو سر سيطرة مصر على المراكز الأولى على مستوى العالم في لعبة الاسكواش على مستوى السيدات والرجال؟ ده كان السؤال اللي سألته “نيويورك تايمز” الأمريكية، في تقرير نشره الصحفي الاقتصادي المخضرم “ديفيد سيجال” بعد فوز اللاعبة المصرية “نور الشربيني” ببطولة العالم للسيدات ضد منافستها المصرية برده “رنيم الوليلي” وفوز “محمد الشوربجي” على أخوه “مروان” في بطولة العالم للرجال.

رياضة الاسكواش بقت لغز في عالم الرياضة، واللاعبين المصريين مسيطرين بالكامل على البطولات والمراكز الأولى دوليًا وإقليميًا، وده خلى مواقع عالمية زي نيويوك تايمز تهتم وتنشر التقرير اللي كان واضح فيه إن لعبة الاسكواش في مصر هي الأنجح، واحتلال 9 مصريين قائمة الـ20 الأفضل عالميًا ومنهم 4 في المراكز الأولى، بيقولنا قد إيه اللاعبين المصريين مسيطرين على اللعبة بشكل كامل. 

على الناحية التانية كان في تحذير من الجريدة الأمريكية من هيمنة الأجيال المصرية اللي جاية على لعبة الاسكواش، وده بسبب فوز المنتخب الوطني للشباب للفتيات ببطولة العالم 7 سنوات متتالية، وده كمان اللي خلي “رنيم الوليلي” المصنفة الأولى على العالم تقول في تصريحات صحفية، إن السؤال عن سر هيمنة مصر على لعبة الاسكواش سؤال اتسألته كتير، إلا إنه لحد النهارده مفيش إجابة له.

تقرير “نيويورك تايمز” قال بشكل واضح إن مصر بتقدم دروس لأي دولة، بتفكر أو بتسعى للتنافس في الرياضات الفردية، بإن النجاح بيولد نجاح، وفي حالة إنه تم إنشاء ملاعب تغطي جميع أنحاء الجمهورية، ساعتها مش هيبقى في منافس لمصر في الاسكواش خلال الـ10 سنين اللي جايين.

وفي بطولة العالم للاسكواش للسيدات، واللي نظمتها مصر على سفح الأهرامات، حضرت اللاعبة الأمريكية “صابرينا صبحي” المصنفة 61 على العالم علشان تعرف سر هيمنة المصريين على اللعبة، وبعد مشاهدتها لمباريات اللاعبات المصريات، أكدت إن الاسكواش في مصر استثنائي، وإنه مفيش مجال لمنافسته، وأكدت إنه على الرغم من إن الولايات المتحدة فيها 1.7 مليون لاعب اسكواش، و3500 ملعب، ومصر بيلعب فيها أقل من 10 آلاف لاعب اسكواش، وفيها 400 ملعب بس، لكن الفرق كبير، ونجحت مصر في إنها تستحوذ على كل ما يتعلق بمنافسات لعبة الاسكواش وبطولاتها ومراكزها الأولى.

مقترح