The Definitive Guide to Living in the Capital , Cairo , Egypt

كل يوم فيه إنجاز جديد بيقدر يحققه المصريين بإيديهم، في كل مجال وفي أي حته في العالم، وإنجازنا اللي هنتكلم عنه النهارده صحيح يمكن يكون إنجاز شخصي لشاب مصري، لكنه على اسم مصر، ومكتوب بإسم مصري.

المغامر “شريف العبد” سجل اسمه النهارده في تاريخ المغامرات كتاني مصري يوصل لقمة “إفريست” واللي تعتبر أعلى قمة جبلية في العالم، بعد 12 سنة تقريبًا من انجاز المصري الأول “عمر سمرة” واللي كان العالم كله بيتكلم عنه.

الحلم والإنجاز اللي وصلهم “العبد” بوصوله لقمة “إفريست” أكيد ما اتحققش في يوم وليلة زي ما حكى لموقع “مصراوي” ، وده اللي خلاه يحضر ويجهز ويخطط للطلعة دي 3 سنين متوصلة، خى خلالهم شغله هوه مغامرته، واتعلم فيهم تسلق الجبال، ودخل في أول تجربة ماراثون لمسافة 5 كيلومتر، وبعدين اشترك في رحلة مشي لمسافات طويلة في “نيبال”، كل ده علشان يتعود على تنظيم النفس، وتحمل المشاق.

وفي رحلة “إيفرست” اللي سجل فيها “العبد” اسمه كتاني مصري يوصل لقمة “إيفرست” كان معاه فيها 15 مغامر عربي، من دول مختلفة زي الأردن ولبنان وعُمان، وكانت أول حاجة عملها لما وصل على القمة، هي إنه اتصل بأبوه وأمه علشان يفرحهم بإنجازه.

الرحلة بدأت في 4 إبريل اللي فات، وكان فيها صعوبات مش عادية أبدًا، بدأت بعملية التسلق نفسها، وفي مرحلة منها عانى “العبد” من الجفاف، ووصلت لقمة الصعوبة والمعاناة لما توفى أح أصدقاء “العبد” في رحلة الهبوط.