The Definitive Guide to Living in the Capital , Cairo , Egypt

بعد انتشار فيروس “كورونا” المستجد في عالمنا، أصبح العزل المنزلي ضرورة مش رفاهية، ومع إغلاق صالات الجيم في مصر أبوابها، أصبحت ممارسة الرياضة أمر مش سهل، خصوصًا إن ناس كتير مش متعودة على ممارسة الرياضة في البيت.

وطبعًا كلنا عارفين إن كتير من الأبحاث أكدت أن الحركة وممارسة التمارين الرياضية، أمر مهم للصحة الجسدية والعقلية، وعلشان كده من الضروري كل واحد مننا يفضل نشيط خلال الفترة العصيبة اللي كلنا بنمر بيها.

طيب ليه لازم تحافظ على لياقتك حتى وأنت في البيت؟

شوف يا سيدي، النشاط البدني بيساعد على خفض ضغط الدم والكوليسترول، وممكن يقلل بشكل كبير من خطر الإصابة بأمراض القلب والسكتة الدماغية والسكري.

كمان النشاط البدني بيساعد على الحفاظ على كتلة العضلات وكثافة العظام، وتقوية جهاز المناعة.

أما فيما يتعلق بالصحة النفسية، فلازم كلنا نعرف إن ممارسة التمارين بيساعد على تقليل هرمونات “التوتر” زي الكورتيزول، وبيعزز إفراز هرمونات “السعادة” زي الإندورفين.

وعلشان تمارسوا الرياضة في البيت بطريقة بسيطة وسهلة وسليمة، فيه شوية نصائح مهمة، هنقول لكم عليها في السطور الجاية، والنصائح دي نشرها موقع سكاي نيوز مؤخرًا.

– لو كنت بتمتلك أجهزة رياضية في البيت، يبقى مهم تحافظ على روتين رياضي يومي، زي المشي على الجهاز أو ركوب الدراجة الثابتة.

– لو عندك سلم في البيت، تقدر تستغله في الطلوع والنزول على مدار اليوم لزيادة ضربات القلب.

– أما في حال عدم وجود أدوات رياضية أو سلم، يبقى تقدر تستغل المواد الغذائية أو غيرها من المواد الثقيلة نسبيًا الموجودة في بيتك، زي أكياس الأرز أو زجاجات الزيت أو الماء، واللي تقدر تستخدمها كأنها أثقال في تمارينك.

– فيه وسيلة تانية ممتازة لتحريك الجسم وزيادة ضربات القلب وهي نط الحبل.

– كمان تقدر تتابع مقاطع الفيديو الموجودة على موقع يوتيوب أو بعض التطبيقات، المختصة بالتمارين الرياضية، خاصة التمارين اللي تقدر تمارسها من البيت.

– وفي حالة إنك مش من محبي التمارين الرياضية، فتقدر تحصل على بعض المرح والنشاط بالرقص أو النط، خاصة مع وجود أطفال في البيت.