The Definitive Guide to Living in the Capital , Cairo , Egypt

وسط البلد أصبحت حاجة مختلفة، المنطقة شهدت تطورات كبيرة وأصبحت خالية من الباعة الجائلين وأهدأ وأجمل والمشي في شوارعها بقى تجربة ممتعة. الجميل كمان إننا خلال أيام هنشوف مشروع مهم في وسط البلد، وهو مشروع “كايرو بايك” اللي بيهدف لنشر ثقافة ركوب العجل باعتبارها وسيلة مواصلات غير مكلفة وصديقة للبيئة.

تعالوا نتعرف أكتر على تفاصيل المشروع.

1 – تم بالفعل تركيب نموذج حقيقي لمحطة الدراجات، وفي الأيام الجاية هيتم تركيب أغلب المحطات ونشرها في وسط البلد، وده ضمن الإجراءات التنفيذية لتفعيل مشروع “كايرو بايك” اللي هيدخل حيز التطبيق منتصف شهر يوليو الجاي، وهيقوم على نشر استخدام الدراجات بين أهل القاهرة وزوارها كوسيلة بديلة للنقل بالعاصمة.

2 – بحسب تصريحات لمحافظ القاهرة خالد عبدالعال، محافظة القاهرة هتكون الرائدة في تطبيق المشروع ده على نطاق واسع بعد ما كانت التجارب السابقة بتقتصر على المجتمعات العمرانية المغلقة أو في نطاقات ضيقة تانية.

3 – تم اختيار مسمى “كايرو بايك” أو”دراجة القاهرة”، خلال نقاشات قامت بيها محافظة القاهرة مع المجتمع المدني ومجموعات ركوب الدراجات والمهتمين بالقضايا البيئية.

4 – مشروع “كايرو بايك” هو نتاج شراكة بين محافظة القاهرة وشركاء التنمية من بداية مراحل التخطيط وبدعم برنامج الأمم المتحدة للمستوطنات البشرية UNHABITAT وتمويل من مؤسسة دروسوس السويسرية drosos ودعم فني وإشراف من معهد سياسة النقل والتنمية ITDP.

5 – تم الانتهاء من تصميم المحطات والدراجات وتطبيق الموبايل (الأبليكيشن) الخاص بيها، وبتعتمد فكرة منظومة مشاركة الدراجات على وجود شبكة كبيرة من النقاط اللي بتتوافر فيها دراجات للاستخدام العام بتدار بتطبيق على الموبايل وبأسعار منخفضة بتبدأ من جنيه للساعة الواحدة أو من خلال كارت شحن مسبق الدفع.

6 – هيتم تنفيذ المشروع في مناطق وسط البلد وجاردن سيتي والزمالك كبداية بأسطول من 500 دراجة هيتم تتبعها بالـGPS موزعين على 45 محطة في أماكن استراتيجية بتتكامل مع محطات المترو وخطوط النقل العام، وبعدها هيتم دراسة نشرالمشروع في أماكن تانية.

7 – المشروع اللي بتتفرد بيه محافظة القاهرة بيتواكب مع قيام مصر بالاستعداد لاستضافة قمة المناخ (COP27)، وبتسعى محافظة القاهرة لمواكبة تطورات العصر وتسهيل الممارسات الصحية والبيئية لتقليل الانبعاثات الضارة بالعاصمة، والحد من الاعتماد المتزايد على السيارات في إطار تنوع وسائل التنقل الصحي والصديق للبيئة، وبتتوقع المحافظة إن المشروع ده هيساهم في تخفيف الكثافات المرورية بمنطقة وسط القاهرة.