The Definitive Guide to Living in the Capital , Cairo , Egypt

رمضان شهر الخير والصحة والبركة، والمشروبات جزء مهم من شهر رمضان.. لكن زي ما فيه منها مشروبات مفيدة للصحة، فيه مشروبات مضرة جدًا ولازم تبعدوا عنها.

في الموضوع ده هنعرفكم على أفضل المشروبات، وهنعرفكم كمان على مشروبات ليها نتائج عكسية.

أول قاعدة لازم نكون كلنا عارفينها هي إن العصائر اللي بنستخدم السكر في صناعتها، بمختلف أنواعها، بتعتبر من المشروبات المضرة في رمضان، وده بسبب احتوائها على نسبة عالية من السكر وكمان السعرات الحرارية.

وغلط جدًا إن الشخص الصايم، يفطر على عصائر الفواكه المحلاة بالسكر، خصوصًا لو زود منها، لإن ده بيؤدي لزيادة السكر في الدم بشكل مفاجئ، ومن ثم هبوطه على نحو سريع، وبالتالي بيؤدي ده لأضرار صحية.

وهنا بينصح الأطباء عند الإفطار على عصير الفواكه، أنه يكون طازج وبدون سكر، وتتم إضافة كمية من المياه للعصير، ونشرب كمية قليلة منه، علشان ما نضرش الأعضاء الداخلية للجسم.

كمان بينصح خبراء التغذية بالابتعاد عن المشروبات الغازية قدر الإمكان في رمضان، لإنها بتحتوي على سكر أكثر من الموجود في العصائر الطازجة، كمان هي غير مفيدة للناس اللي عاوزة تنقص وزنها في رمضان.

أما عصائر البودرة الجاهزة، واللي فيه ناس بتفتكر أنها أخف وأفضل من العصائر المحلاة الثقيلة، فبيشير خبراء التغذية إلى أنها بتتساوى في مضارها مع العصائر المحلاة، لإنها بتحتوي على كميات كبيرة من السكر، الجسم مش محتاجها.

وبتؤكد الكثير من الدراسات أن شرب العصائر المحلاة بيزيد من فرص الإصابة بمرض السكري، كمان شربها بيتسبب في السمنة، اللي بترتبط بشكل كبير بعدد من أمراض القلب والأوعية الدموية.