هل لقاح COVID-19 آمن؟.. إجابات أشهر 6 أسئلة بيرددها الناس عن لقاح كورونا
أسئلة عن كورونا اسئلة عن لقاح كورونا كوفيد-19 لقاحات كورونا في مصر هل لقاح كورونا آمن
Mohamed Talaat
الفترة دي، ومع قرب حصولنا في مصر على لقاحات فيروس كورونا المستجد (كوفيد 19)، فيه عشرات الأسئلة بتدور في أذهان المصريين عن لقاحات كورونا وأهمية التطعيم بيها للوقاية من العدوى، ونفس الأسئلة دي منتشرة في العالم كله، وهي بتعبر عن حالة خوف طبيعية من فيروس فتاك غير حياتنا كلنا. في الموضوع ده جمعنا أشهر 6 أسئلة منتشرة عن اللقاح، وهنعرفكم إجابات المتخصصين عليها.
1- هل لقاحات COVID-19 آمنة؟
في الأول مهم نعرف إنه علشان يتم الحصول على الموافقة على أي لقاح للتطعيم، لازم يخضع لسلسلة من فحوصات السلامة الصارمة، وده اللي حصل مع أمصال كورونا.
وخضعت نتائج تجارب اللقاحات لتقييم هيئات الدواء والغذاء بمختلف الدول بعناية شديدة، ووصلت جميعها لنتيجة طبية موثوقة بتؤكد أنها بتلبي معايير الأمان والفعالية والجودة العالية المطلوبة.
2- إيه هي مكونات لقاحات كورونا؟
بتختلف مكونات لقاح “كوفيد-19” من نوع لتاني، لكن أغلب الأمصال اللي تم اعتمادها لحد اللحظة دي بتحتوي على:
– مكون بروتيني للفيروس.
– قطعة من الكود الجيني (DNA أو mRNA).
– جرعة صغيرة جدًا من فيروس ضعيف.
– مادة لتعزيز الاستجابة المناعية (مادة مساعدة).
– كمية صغيرة من المواد الحافظة.
– ماء ملح معقم (محلول ملحي) للحقن.
3- هل فيه أي آثار جانبية للقاحات؟
ممكن يعاني بعض الأشخاص اللي بيتم تحصينهم من بعض الآثار الجانبية الخفيفة، وبتوصف المراكز الأمريكية للسيطرة على الأمراض الآثار دي بأنها “علامات طبيعية على أن جسمك بيبني الحماية”، وبتشمل الآثار الجانبية الشائعة:
– ألم وتورم في ذراعك (مكان الحصول على اللقاح)
– تعب
– صداع الرأس
– حمى
– قشعريرة
لكن الخير الكويس هو إن الآثار الجانبية دي بتكون مؤقتة.
4- مين الشخص اللي ممنوع يحصل على لقاح كورونا؟
بشكل عام، من الآمن تحصين معظم الأشخاص في المجتمع، لكن فيه بعض الاستثناءات. على سبيل المثال أوصت هيئات الدواء والغذاء بمختلف الدول أي شخص عنده حساسية من أي مكونات في لقاحات كورونا بعدم تحصينه، علشان كده وبشكل عام مهم تتكلم مع طبيبك قبل الحصول على لقاح COVID-19.
5- هل بعد حصولي على اللقاح ممكن اتعرض للإصابة بالفيروس؟
للأسف أيوة، المناعة القوية بتاخد وقت علشان تتطور. وبعد اللقاح بيتم تنشيط الخلايا المناعية وبتبدأ عملها لصنع بروتين يستهدف الفيروس بيسمى “الجسم المضاد”.
بعد الجرعة الأولى، بتبدأ كمية متواضعة من الأجسام المضادة في الدم ممكن تحميك من المرض، والعملية دي كلها بتستغرق من أسبوع إلى أسبوعين.
وأغلب اللقاحات الموجودة في السوق حاليًا بتتاخد على جرعتين بفاصل 3 أسابيع على الأقل.
ومع الجرعة الثانية بتبدأ عملية زيادة مستويات الأجسام المضادة عندك. وخلال 5 أسابيع بعد التطعيم هيكون عندك أخيرًا ما يكفي من الأجسام المضادة المنتشرة لحمايتك من المرض الشديد.
6- هل اللقاح مناسب للنساء الحوامل؟
بحسب توصيات الكلية الملكية الأسترالية والنيوزيلندية لأطباء النساء والتوليد، الأفضل للنساء الحوامل عدم الحصول على اللقاح نظرًا لوجود بيانات أمان محدودة، لإنه ماكنش فيه غير عدد قليل من النساء الحوامل أو المرضعات في التجارب السريرية. لكن من ناحية تانية، بيقول الأطباء المختصون إنه مافيش دليل على مخاوف تتعلق بالسلامة أو ضرر للنساء الحوامل أو الأطفال. وبالتالي لازم النساء الحوامل تتابع مع طبيب مختص وتسمع نصيحته.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
