The Definitive Guide to Living in the Capital , Cairo , Egypt

تفتكر إيه هي السعادة؟ ويا ترى لقيتها؟ طب ممكن نلاقي السعاده فين وإزاي؟ كل دي أسئلة محورية دايمًا بتنط في دماغنا أول ما نلاقي كلمة “السعادة” مكتوبة قدامنا، أو لما حد يقولها في كلامه معانا.

سمعنا في “كايرو 360” كلام البروفيسور “سانجيف تشوبرا” أستاذ الطب في جامعة هارفرد المعروفة، في محاضرة ليه ضمن برنامج “TED Talk 2019” اللي بتنظمه “TEDX ” واللي شرح فيها أربع حاجات ارتبطت علميًا بالسعادة، تعالوا نعرف هي إيه:

1 – الأصدقاء والعيلة:

توطيد علاقاتك بالأشخاص اللي بتثق فيهم عامل أساسي لسعادتك، علشان كده مهم إنك تختار أصدقاءك بعناية، وتحتفل معاهم بكل حاجة حلوة في حياتك مهما كانت صغيرة.

2- التسامح:

قدرتك على التسامح هتشيل عن كتفك تقل وسخافة الكراهية والمشاعر السلبية التانية اللي أكيد هتأثر بالسلب على مستوى سعادتك.

3 – العطاء:

كل ما تغرق في الأعمال الخيرية والتبرعات والمساعدات كل ما سعادتك هتزيد، وده كلام باحثين كتير أكدوا إن الأشخاص اللي بيتطوعوا في الأعمال الخيرية عادةً بيكونون أكثر سعادة، وأكثر ثقة في النفس، وعندهم معدلات حياة أطول من غيرهم.

4 – الامتنان:

بيقولك: “لو ما عرفتش لغة الامتنان، يبقى مالكش في السعادة أبدًا” لإن زي ما قال “تشوبرا” في محاضرته، إن ممارسة الامتنان ممكن تكون بمنتهى البساطة إنك تقول: “أنا ممتن” على الأقل مرة واحدة في اليوم.

ووفقًا لدراسة من جمعية علم النفس الأميركية، فإن الإقرار بالامتنان بيساعد الناس على التمتع بالتجارب الإيجابية، والتغلب على الظروف الصعبة وتقوية علاقاتهم.

نتمنالكم السعادة دايمًا فين ما كانت يا أهل القاهرة.