The Definitive Guide to Living in the Capital , Cairo , Egypt

مع انتشار فيروس “كورونا” المستجد، واللي أصبح وباء وأصاب ما يقرب من 2 مليون إنسان على مستوى العالم، وتوفى بسببه أكتر من 100 ألف شخص حول العالم، كتير من الشركات والمؤسسات الحكومية والخاصة قررت تطلب من موظفيها إما العمل من المنزل أو تقليل ساعات العمل أوالعمل بنظام التناوب.

لكن لو أنتم مضطرين تنزلوا من بيتكم الفترة دي وتروحوا الشغل، لازم تتبعوا نصائح الوقاية والحماية لنفسكم علشان ماتكونوش عرضة للإصابة بمرض “كورونا”، وإحنا خلال السطور الجاية هنقول لكم 10 نصائح طبية مهمة لازم تطبقوها.

1- غسل الإيدين

من أول التوصيات اللي أنتم مطالبين أنكم تلتزموا بيها، هي أنكم تغسلوا إيديكم بالماء الدافئ والصابون دايمًا، أو استخدام معقم اليدين اللي بيحتوي على كحول.

2- تعقيم المكتب والأدوات

لازم تعقموا المكتب اللي هتقعدوا عليه، وكمان الأدوات اللي هتستخدموها، لاحتوائهم على بكتيريا كتير جدًا، ممكن توصل لحوالي 1600 نوع من البكتيريا.

3- التعامل مع الحمام

دايمًا خلوا استخدامكم للحمام قليل، ولازم تعقموا وتطهروا كل حاجة هتلمسوها، ومش محتاجين نقولكم أن الحمام مكان مليان فيروسات، ويفضل بعد غسيل الأيدين استخدام مجفف الإيد أو مناديل ورقية للتنشيف، ولما تفتحوا الحنفية أو الباب استخدموا قفازات أو منديل ويترمى بعد كده.

4- استخدموا أدوات خاصة

خليكم حريصين على استخدام الأدوات الخاصة بيكم ومتشاركوهاش مع زملائكم، وأهم حاجة يكون معاكم كحول مطهر أو جل تعقيم ومناديل ورق وصابون وغيرهم.

5- بلاش لمس أي حاجة

وعلشان تقللوا من الإصابة وزيادة في الوقاية ماتستخدموش إيديكم في لمس أي حاجة، استخدموا مناديل علشان تلمسوا أي حاجة مهما كانت، ولو هتستخدموا قفازات يبقى لازم تكون لمرة واحدة وبعدها تترمي.

6- بلاش الأحضان

بلاش تلامس جسدي وأحضان في الشغل واكتفوا أنكم تشاوروا من بعيد، وده لحمايتكم من الإصابة من شخص ممكن يكون مصاب حتى لو مش ظاهرة عليه الأعراض.

7- حافظوا على المسافات

أكيد بسبب الشغل وتفاصيله بتتكلموا مع بعض كزملاء أو ممكن تجتمعوا في غرفة الاجتماعات، ولو ده حصل لازم تحافظوا على مسافات كفاية ما بينكم ماتقلش عن متر واحد، وكمان غطوا وشكم بكمامة لو أنتم موجودين في وسط مجموعة كبيرة من الزملاء.

8- ماتلمسوش وشكم

الدراسات أثبتت أن الإنسان بيلمس وشه أكثر من 23 مرة في الساعة الواحدة، وبتزيد مع ضغوط العمل، فلازم تركزوا وماتلمسوش وشكم واستخدموا مناديل ورق للعطس والكحة والتخلص منها بعدها في سلة القمامة وتغسلوا ايديكم بالمياه والصابون.

9- اختاروا مكان منعزل

لو أنتم ماعندكمش مكتب خاص بيكم وبتعتمدوا على الشغل في أي مكان في الشركة، فأختاروا مكان منعزل وابعدوا عن الزحمة وخلوا فيه مسافة كفاية بينكم وبين الزملاء في العمل، وماتنسوش تعقموا المكان اللي هتقعدوا فيه.

10 – الراحة

لو حسيتوا بتعب من أي نوع، أو لو ظهرت عليكم بوادر البرد، وأهم حاجة السعال وارتفاع درجة الحرارة، لازم تبلغوا مديركم وتاخدوا إجازة وتقضوها في البيت، وعمل حجر صحي، ولو مافيش تحسن خلال 3 أيام تواصلوا مع طبيب أو الخط الساخن لوزارة الصحة للمساعدة.