The Definitive Guide to Living in the Capital , Cairo , Egypt

كل سنة وأنتم طيبين! شهر رمضان مشهور بالمشروبات والعصائر المميزة والمفيدة واللي بتكون على سفرة الفطار مع الأكل المختلف اللي بيكون على السفرة.

في الموضوع ده هنتعرف على أفضل 6 مشروبات رمضانية لازم تكون على سفرتك في رمضان بسبب أهميتها الصحية الكبيرة، بحسب خبراء التغذية.

الكركديه

هو أفضل المشروبات للي ماشيين على نظام غذائي أو رجيم، لأنه قليل فى السعرات الحرارية وغنى بفيتامين ج اللي بيساعد على تقوية المناعة ونضارة البشرة.

الدوم

من المشروبات المفيدة لأنه بيظبط نسبة الكوليسترول فى الدم وبيساعد على خفض ضغط الدم المرتفع، كمان هو قليل السعرات الحرارية.

الخروب

من المشروبات المثالية على سفرة الفطار فى رمضان، علشان بيحتوي على مضادات الأكسدة اللي بتحمى الجسم وبتنقيه من السموم، وبيحتوي كمان على الكالسيوم اللي بيساعد على الشعور بالراحة.

قمر الدين

من المشروبات الرمضانية المفيدة، لاحتواءه على المعادن زي: البوتاسيوم والماغنسيوم والحديد والزنك، وبيساعد قمر الدين على تعويض الجسم عن العطش والجفاف من الصيام، كمان بيمد الجسم بالأملاح المعدنية المفقودة على مدار اليوم، لكن لازم يتم تناوله بحرص واعتدال بالنسبة لمرضى السكري بشكل خاص.

السوبيا

من المشروبات الرمضانية اللي بتناسب الأطفال واللي بيعانوا من النحافة، لأنه غنى بالسعرات الحرارية لاحتوائه على اللبن والنشا والسكر وجوز الهند.

العرقسوس

من المشروبات اللي بتناسب مرضى قرحة المعدة، كمان بيساعد على تقليل أعراض الحموضة وحرقان المعدة، ده غير إنه فاتح للشهية ولكن يجب تناوله بحذر بالنسبة لمرضى ضغط الدم المرتفع.