The Definitive Guide to Living in the Capital , Cairo , Egypt

كل عيد وأنتم طيبين، وبصحتكم متهنيين، وعلشان صحتكم مهمة جدًا بالنسبة لنا، بننصحكم تاخدوا بالكم من نظام الأكل والشرب في ليلة العيد وأيامه، وبلاش تكتروا من المنبهات والمشروبات الغازية، وبلاش أكل مملح كتير، وأشربوا مياه كتير، وكتروا من أكل الخضراوات.

واسمحوا لنا نقول لكم على 7 نصائح غذائية من الدكتورة فرح حسين، استشاري التغذية العلاجية، علشان تقضوا العيد من غير آلام في المعدة أو تعب جسدي، والنصائح دي نقلًا موقع العين.

فطار خفيف

فيه ناس بتفطر فطار تقيل في أول أيام العيد، وده خطأ كبير، لأن المعدة مبتكونش اتعودت على الأكل ومبدأتش تشتغل الصبح، علشان كده يفضل يكون الأكل في الصبح بكميات قليلة وتزودوها تدريجيًا.

حلويات العيد

كتير مننا في العيد بياكلوا الكحك والبسكويت من ليلة العيد وطول الأيام التالية، وبينسوا أن الجسم اتعود طول شهر رمضان على الراحة من الأكل، وده بيعمل خلل وربكة في الجهاز الهضمي، وعلشان كده لازم يكون أكل الكحك والبسكويت خفيف، علشان ماتتعرضوش لمشاكل صحية كتيرة أخطرها السمنة والسكري.

شرب الماء

العصير شيء رئيسي في رمضان، والناس بتكمل معاه في العيد، ولكن ممكن تبدلوا العصير ده بـ2 لتر مياه في اليوم، وبلاش العصير اللي فيه نسبة عالية من السكريات، وخاصة إنكم أخدتم كفايتكم طوال شهر رمضان منه.

الأكل الدسم

بلاش تاكلوا أكل دسم أو مقلي في زيت بشكل كبير، ويفضل كمان لو تعتمدوا على الشوي والسلق، وده علشان تحافظوا على الجهاز الهضمي ومشاكله اللي ممكن تحصل من كمية الدهون.

اللحوم

الناس اللي بتفطر وتتغدى وتتعشى لحمة في العيد، أنتم كده بتضروا جسمكم، لأن اللحوم أكبر من قدرة الجسم أنه يهضمها، وده هيؤدي لتخزين الدهون وارتفاع نسبة اليوريا، وحمض اليوريك والكوليسترول في الدم، وده ممكن يعرضكم للإصابة بأمراض القلب والأوعية الدموية، وعلشان كده متاكلوش لحمة كتير وكفاية مرة واحدة خلال أيام العيد، وتطبخوها بطرق صحية متزودش الدهون.

زيادة الحركة

أخيرًا ماتبقوش من الناس اللي بتاكل كتير وتريح بعدها، لإن ده هيصيبكم بالسمنة وكمان مخاطر صحية كبيرة، ولازم خلال أيام العيد وخاصة بعد الأكل تعملوا أي نشاط رياضي سواء كان تمشية ، او بعض الحركات الرياضية، أو أي لعبة في تقدروا تلعبوها في البيت.